إللي يخاف من العفريت

المشهد الأول

المنظر في اليمين حجرة خشبية مؤثثة أثاث بسيط تدل على صاحبها00 وابور جاز وبعض الآنية00 مكتب صغير عليه كتب00 باب الحجرة يطل على الفراغ الموجود من الوسط على يسار المسرح 00000

إلى اليسار 00 حبل غسيل وتبدو أعالي العمارات في نهاية المسرح00 ويفتح الستار على صوت خضرة وهى تغنى00 ومختار على المكتب يذاكر 0000

خضرة

يا مسافر وناسى هواك 00 رايداك والنبي رايداك000 والنبر رايداك 00000 ( تقوم بنشر الغسيل على الحبل 0000 )

رايداك والنبي رايداك

مختار ( يخرج من الحجرة 00)

أيه يابت الدوشة اللي انتى عاملاها عالصبح دى

خضرة

تقول على صوتي دوشة يا سى مختار

مختار

إياك تكوني فاكره نفسك ليلى مراد

خضرة

وإنا أقل عنها في أيه إن شاء الله

مختار

روحي شوفي لك فومين غسيل00 ولا حتتين مواعين اغسليهم

خضرة

ياسى مختار00 انت بتستقل بيا ولا أيه 00 دا أنا خضرة على سن ورمح00 دا أنا اوديك البحر وأجيبك عطشان

مختار ( يضحك بصوت عال جدا 000 )

خضرة

الله يسامحك بتضحك عليا

مختار

يا بت أنا بهذر معاك

خضرة

يا عيب الشوم يا سى مختار 00 إيشى جاب لجاب 000

مختار

الله 00 دا أنا بحبك يا بت

خضرة

وأنا من مقامك برضه

مختار ( يقترب منها 0 ) 00 مقام أيه ويتاع أيه00 كلنا ولآد آدم وحوا 00 ( يمسك يدها 00 ) صدقيني يا بت 00 من أول رجلي ما حطت هنا في السطح وشفتك وانتى طالعة كل يوم00 لقيتنى بأراقبك00 وااااااااااااااااابص عليك000 حسيت إحساس غريب 000 أيه هو 00 لغاية ما عرفت انه الحب

خضرة

صحيح

مختار

بقيتي حتة منى 00 أنا لما يعدى عليا اليوم اللي ما أشوفكيش فيه أحس إن فيه حاجة ناقصانى

خضرة ( كالحالمة )00

آه 00 سى مختار

مختار

قولي مختار بس00 وأنا وانتى بقينا واحد00 وما فييش أي قوة هتقدر تفرقنا

( يقترب منها00 ويحتويها بين ذراعيه00 ويقترب منها أكثر ويحاول تقبيلها00 ويسمع صوت دبيب أقدام على السلم00 ويعلو الصوت شيئا فشيئا 00 وتشعر به خضرة 00 وتتملص من بين يديه 00000 )

مختار

ومين الزفت ده اللي ما عندوش دم 00 وطالع عالصبح

خضرة

دا باينه عمك خليل

مختار ( في نفسه 00 عمى الدبب00 ( ينتحي جانبا ناحية الحجرة كأنه يهرب من شيء 000 )

عم خليل ( رجل ضخم في الخامسة والسبعين من عمره 00 طويل القلمة000 ويسير بانحناء ويملك وجها بيضاوي الشكل 00 وله رأس كبيرة نصفه أصلع 00 والنصف الثاني يكسوه شعر كثيف وتجاعيد وبثور على وجهه00 وله شامة كبيرة على الخد الأيسر000 ورقبته قصيرة جدا حتى يخيل لك بأن رأسه مغروسة بين كتفيه00 وعندما يسير يحدث صوتا مسموعا 00 )

( تتظاهر خضرة بانهماكها في نشر الغسيل00 ويبتعد مختار حتى لا يراه عم خليل 000 )

عم خليل ( لخضرة )

يا صباح الفل على عيونك يا خضرة 000 خضرة إزيك يا عم خليل 00

عم خليل

كل ما بشوفك بأحس انى كويس

خضرة

يا راجل يا اونطجى

عم خليل

تتجوزينى يا بت

خضرة أتجوز واحد أد جدى00 يا شيخ روح

عم خليل

يا بت أنا بحبك وعاو زك في الحلال00 0 يقترب منها 00 )

خضرة

إوعى بقى

( يحاول عم خليل تقبلها فتدفعه خضرة بقوة فيقع على الارض00 فيضحك مختار ضحكة يحاول مختار كتمها إلا أن عم خليل يسمعه 000 )

عم خليل ( يحاول النهوض )

انت هنا يا سى بتاع عالصبح وإنا طالع عشان اسود عيشتك

مختار

الطيب أحسن يا عم خليل 00 ما تخليها بيضا أحسن

عم خليل

انت خليت فيها بيضا ولا سودا00 سبع شهور يا ضلالي مستحملك 00 ومستحمل بلا ويك000 وعمال تلاوع في الايجار00 وهى كلمة واحدة إن ما اتصرفتش وجبت لي الايجارالنهاردة ما هيقومش عليك صبح

مختار

ادينى فرصة يا عم خليل لحد ما تجيللى فلوس من البلد

عم خليل

موش هاصبر عليك اكتر من كده 00 ولمؤاخذة بقى فيه ساكن جديد عشان الاوضة

مختار

يرضيك أترمى في الشارع

عم خليل

دى مشكلتك انت

مختار

خللي في قلبك شوية رحمة

عم خليل

أكتر من كده ما اقدرشى

( تنتهي خضرة من الغسيل وتتابع الحوار بين عم خليل ومختار00 وفى هذه الأثناء نسمع صوت أم خضرة تنادى عليها

أم خضرة ( تنادى )

يا بت ياخضرة انتى بتعملى أيه كل ده عندك

خضرة

حاضر يا امة 00 أنا جاية لك 00 ( تخرج من اليمين00 9

مختار

وحياة العيش والملح اللي بينا لتصبر عليا شوية يا عم خليل

عم خليل

لا عيش ولا ملح

مختار

فاضل لي شهور وأتخرج 00 ووعد منى انى هاسدد لك كل مليم عليا ليك

عم خليل

ياما شبعت من الكلام ده

مختار

عم خليل

عم خليل

لا خليل ولا دياولو00 ما تقعدش تلف وتدور عليا

مختار

اللي تشوفه 00 ( يخرج عم خليل من اليمين 000 يتنفس مختار الصعداء00 ويتجه ناحية حجرته 0000 ) ياااه 00 كابوس وانزاح 00 المفروض هو اللي يدينى فلوس ولا يطالبنييش بإيجار 00 كفاية انى مستحمله ومستحمل شكله اللي عامل لي رعب00 دا شبه أمنا الغولةاللى بيخوفوا بيها العيال00 وأربع سنين وإنا مستحمله ومستحمل قرفه00 وما فييش يوم يعدى إلا لما ينط لي كل شوية 0 داخل خارج 00 طالع نازل00 وباتمنى اليوم اللي أخلص فيه عشان ارتاح منه ومن شكله00 وساعات اصحي من النوم ألاقى سيادته مشرف وقاعد لي في الاوضة لغاية ما خلاني أخاف حتى من خيالى00 وموش عارف عزرائيل ساببه ليه 00 ( يجلس على المكتب ويقلب في الكتب 00 ويمسك أحد الكتب بيديه 00 ويقرا فيه 00 ويسمع طرق على الباب 000 )

مختار

يا ترى مين اللي يخبط عليا 00 ده عمر حد ما خبط على الباب ده 00 وخليل الزفت بيدخل من غير استئذان

خضرة

افتح الباب ياسى مختار

مختار

( يفتح الباب) خضرة 00 معقولة

خضرة

( تحمل صينية ومغطاة بمنديل ) هاقف على الباب كتير

مختار ( مرتبكا )

ا00ت00 ف00 ضلى00 ولو إن المكان موش أد المقام

خضرة

( تدخل وتضع الصينية علة المنضدة000 9 بكرة تتخرج وتشتغل وتتنقل مكان يليق بيك أحسن من ده 00 ويتفرش أحسن فرش إن شاء الله يارب

مختار( يشير إلى الصينية 000 ) إيه ده

خضرة

( تكشف المنديل ) فضلة خيرك

مختار

ما لوش لزوم

مختار

هتعمل فرق من أولها

مختار ( ينظر في الصينية )

بيض مسلوق00 بيض مقلي 00 فول 00 قشطة00 ياااه 00 كل ده عشانى00 دا أنا أول مارجلى عتبت هنا عمري معدتي ما داقت الحاجات دى

خضرة

كل يا سى مختار بإلهنا والعافية

مختار ( يأكل بشراهه00 كأنه لم يأكل من قبل 00 يشعر بانسداد في حلقه 00 تسرع خضرة وتناوله كوب ماء )

خضرة

مطرح ما يسرى يمرى

مختار

( ينتهي من طعامه ) الحمد لله00 وديمها علينا يارب واحفظها من الزوال00 ويخليكى لي يا حبيبتي

خضرة ( تحمل الصينية )

مختار

رايحة فين 00 فيه كلام كتير عاوز أقوله لك وكنت مستني الوقت المناسب 00 وآدى الفرصة جت لحد عندى00

خضرة ( كالمنتظرة أن تسمع شيئا ويقترب مختار منها00 ويحتويها بين ذراعيه فتحاول خضرة التملص منه ويجذبها مختار إليه مرة اخرى000 وتختفي الأضواء تدريجيا مصحوبة بصوت دق طبول منذرة بوقوع شيء حتى تختفي الانضواء تدريجيا 00 )

ستار

المشهد الثاني
المنظر

نفس المنظر السابق

ويكاد يكون المسرح مظلم تماما00 ويسمع صوت طرق على الباب00 طرق متواصل 00 صوت باب يفتح 000 دبيب أقدام بإيقاع منتظم 00 ينقطع الصوت

مختار

مين 00 0 م 00 م 00 ي 00 ي 00 ن 00 م00 ين 00 ن هناك 00 ماحدش عاوز يرد 00 يا ليلة موش فايتة00 مين هناك00 الله ممكن يكون بيتهيا لى00 ولا ده من تأثير المذاكرة 00 صحيح أنا باجهد نفسي كتير زيادة عن اللزوم00 لكن كله يهون عشان ألاقى نفسي وأحقق ذاتى00 تعبت كتير وشقيت كتير00 جعت 00 اتعريت00 واتحملت اهانات خليل00 الله يخرب بيته اللي عمال ينط لي كل شوية 00 ومسيب ركبي في الرايحة والجاية000 وعشان إيه كل ده00 موش عارف00 إيجار سبع شهور00 طظ 00 أنا بكره لما أتخرج هاديهم له عالجذمة القديمة 00 وهتنقل حتة عليها القيمة على رأى خضرة 00 والله بنت حلال 00 وما تستهلشى اللي أنا باعمله فيها00 والبنت عشمانة انى أتجوزها00 معذورة00 صحيح أنا ما اقدرشى اتجوزها00 قلبها طيب وهتنسى بسرعة00 خضرة موش طموحى00 وهى موش وحشة 00 لكن أنا عايز واحدة ترفعني معاهالفوق00 موش اتنا وهى نقعد ونقول لله00 ونغنى ظلموه00 نهايته 00 لما أنام والصباح رباح 000 ( ولا يزال المسرح مظلما تماما 000 وصوت شخص يروح ويجيء ذهابا وايابافى الحجرة محدثا صوتاباقدامه00 ونسمع صوت ماء يصب فى الكوب 00 صوت شخص يشرب ويرتشف رشفات منتظمة بصوت عال00 يتكرع000 )

عم خليل

اع 000 عا 000

مختار

لا 0 !!!! لا000 كتير قوى كده 00 مين هناك00 فيه حد في الاوضة 00 يا ليلة موش فايتة00 م00 ي00 ن هناك

عم خليل يسير في الظلام متجها ناحية مختار ويسحب الغطاء 000 )

مختار

لا00 لا 00 فيه أيه 00 فيه أيه

عم خليل

( يهزه بشدة 000 )

مختار

لا00 ( ينهض من السرير 00 يتحسس مفتاح الكهرباء 00 يصرخ 000 ) الحقوووو ني 00 الحقونى

عم خليل يضحك ضحكات تجلجل المكان وترد عليه أصوات الضحك 00000 )

الأصوات

هأ000 ها 00 ها 0000

مختار ( يجرى في الحجرة ويصرخ عاليا

عم خليل

يا خيبتك يا خيبتك

الأصوات

( تضحك عاليا

مختار ( يهتدي إلى مفتاح الكهرباء00 ويصرخ ) الحقونى 00 الحقونى 0000

( وتضاء الأنوار في المسرح ونرى مختار شعره منكوش00 ووجهه يميل إلى الاصفرار من جراء الخوف الشديدالذى تعرض له00 يتصبب عرقا 00 وتصطك أسنانه ببعضها ويرتعش بشدة

عم مختار

( يضحك000 ) 00 أنا ما اعرفشى انك

مختار

( يرتعش بشدة 000 ) انت مين رد عليا 000 انس ولا جن

عم خليل

( يضحك ضحكة اعلي 000

مختار

يا عم حرام عليك سيبت ركبي 00 قل لي انت مين00 حرامي 00 ما عندييش حاجت تتسرق00 يا دوب شوية كتب بذاكر فيها00 لو لازمينك خدهم ويحنى

عم خليل ( يضحك )

حرامي إيه يا مغفل 00 انت أجرب 00 حيلتك حاجة

مختار

أمال عايز ايه00 الله يسترك

عم خليل

كل ده ما عرفتنييش

مختار

انت عزرائيل جى تاخد روحي

عم مختار

يا آخى طلعت روحك000 أنا جى ياخد الإيجار حسب الميعاد

مختار

الإيجار 000 هو عزرائيل اللي بيلم الإيجار الأيام دى000 وبعدين إيجار إيه اللي انت بتتكلم فيه

عم خليل

انت ياله هتخدنى في دوكة 00 موش لسه مكلمك امبارح ع الايجاراللى بقاله سبع شهور ما اندفعش 00 واديتك مهلة وجاى لسيادتك عشان تسد دلى اللي عليك

مختار

( بصوت مرتعش ) 00 ع00 م00 خل00ى00 ل

عم خليل

أيوه 00 عمك زفت 00 يالله لايمنى ع الفلوس

مختار

فلوس أيه

عم خليل

الفلوس اللي عليك

مختار

الصباح رباح يا عم خليل00 وبكرة ربنا يفرجها

عم خليل

لا صباح ولا بكرة 00 أنا موش هتعتع من هنا إلا لما تلايمنى ع الفلوس دى الوقتي

عم خليل

وهاجيب لك منين الفلوس دى الوقتي

عم خليل

يا عنى ما فييش 00 يالله لم الشوية الكراكيب بتوعك وما تورينيش وشك

مختار

إزاى يا عم خليل

عم خليل

أديتك فرصة واتنين وما فييش فايدة ( يتجه ناحية المكتب ويقذف بالكتب من الشباك

مختار

( يحاول منعه ) استني يا عم خليل00 انت بتعمل إيه

عم خليل ( يدفعه بعيدا00 ويحمل كرسيا ويرميه إلى الخارج 00 )

مختار

استني بس هادى لك الفلوس

عم خليل

وهتجيبها منين إن شاء الله

مختار ( يحدث نفسه ) وها تخلص من الغبي ده إزاى 00 أحاول أزحلقه باى طريقة00 وبكرة ربنا يعدلها

عم خليل

ه000 ي00ي يه 00 قلت أيه

مختار

يا عم خليل 00 أنا بعت البلد على فلوس 00 وفيه واحد من البلد جى بكرة 00 وهيجيب لي الفلوس

عم خليل

أنا ما باكلشى من الكلام ده( يهم بقذف المخدات إلى الخارج 00 )

مختار

أرجوك استني بس 00 صدقني 00 الفلوس هتكون عندك بكرة زى دى الوقتي

عم خليل

هدى لك أخر فرصة 00 وإذا كنت بتلعب بيا 00 وديني ما هيحصل لك طيب وساعتها لا هتكفينى ولا عشرة زيك 00 ( ويهم بالانصراف ويسير حتى يقف عند الباب ) ها00 ه بكرة زى الوقتى00 تروح هنا 00 تروح هناك00 والله ما أنا سايبك 00 ( ينصرف )

مختار يجفف عرقه ويصلح من هيئته 00 ويتنفس الصعداء كمن دبت الروح فيه مرة أخرى 0000 )

مختار ( يتنهد ) ه 00 ي000 ي 00 ه 000 ياااا00ااه00 إيه الرعب ده 00 دا سيب ركبى00 الله يخرب بيته00 أنا ما صدقت خلصت منه ويا ريت يموت ويروح في ستين داهية00000 ( يتجه إلى الخارج ويجمع الكتب المتناثرة هنا وهناك 00 ويقرا عناوينها في حسرة 000 )

مختار

الأدب المقارن 00 ( يهز رأسه 00 فن القصة بين المحافظين والمجددين 00 تاريخ الأدب 000 فلسفة الجمال00 ( يضعهم فوق بعضهم ويتجه إلى الداخل000 ) معلهش المتخلف ده ما يعرفشى قيمتكم00 كلها شهور بس وادي له بالجزمة واودع الأيام السودة دى ( يضعها على المكتب ويتجه إلى الخارج مرة أخرى ويحمل الكرسى000 ) ولو إن شكلك موش ولا بد 00 بس انت اتهريت واستحملت معايا ياما 000 معلهشى بكرة تترقى انت كمان وتبقى فوتيل قلق منامى00 الهي يقل راحته00 خليل الكلب

( يجلس على كرسي المكتب 00 ويفتح كتابا ويقرا بصوت غير مسموع 000 ينقطع التيار الكهربي 00 يظلم المسرح تماما 000)

مختار

ياليلة موش فايتة000 مين اللي قطع النور00 معقولة خليل اللي قطعه00 ايوة هوموش عاوز يسيبنى في حالى00 عاوز يموتنى من الخوف00 موش مكفيه لمابشوف وشه العفاريت الزرق بيركبونى وكانى شايل هموم الدنيا00 يقوم يجى يقطع النور 000 لا 00 لا

ستار



المشهد الثالث نفس المنظر السابق مختار نائم على السرير 00 يتقلب على جنبيه00 نسمع صوت الباب يفتح00 دبيب أقدام عم خليل00 يزيح الغطاء عن مختار00 لا يشعر مختار بذلك 00 يمد عم خليل يديه ليخنق مختار000 مختار يقوم من النوم مفزوعا00 يقاومه مختار 00 يزمجر عم خليل كالأسد محدثا صوتا عاليا00 ضحكات عالية من خلف المسرح000 تعلو الضحكات شيئا فشيئا وتغطى المسرح كله 000 ودق طبول باقاع منتظم ويعلو الصوت 000 ويتخلص مختار من عم خليل ويدفعه بيديه000 يقع عم خليل على الارض00 ويلملم شتاته00 يحمل عصا ويجرى وراء مختار000 يجرى مختار أمامي ويصرخ مختار الحقونى000 احقونى000 عاوز يموتنى00 ( يعلو صوت الضحكات شيئا فشيئا مصحوبا بدق عنيف للطبول00وكلماازدادت الضحكات ازداد صوت الطبول ) عم خليل (يضيق الخناق على مختاروينهال عليه بالعصا00 ويضرب ضربا متتالي والأصوات تضحك أعلى وأعلى مختار يصرخ 00 يقل الصراخ 00 يشهق بشدة 00 يقع على الأرض عم خليل يترك العصا على الأرض وينصرف في هدوء00 ويظلم المسرح فجأة لفترة قصيرة00 ثم تضاء الأنوار فجأة أيضا 000 يستيقظ مختار من النوم مفزوعا 0 ) مختار حلم ولا علم000 دا أكيد حلم00 أنا أهو حى00 بشحمي ولحمى00 أنا أهو عايش00 أنا ما متش00 ( يخرج من الحجرة ويرى العصا 00 ) الله موش هي دى العصاية اللي كان خليل ماسكها00 يمكن يتهيألى000 بيتهيألى أزاى00 إذا كنت أنا حى00 وخليل ضربني العصاية لحد ما مت00 وبعدين مشى 0 المفروض انى أكون ميت00 يمكن روحي اللي بتتكلم وجسمي هو اللي مات 00 أهو 00 أنا شايف نفسىوحاسس بكل حتة فيه000 لا 00 لا الموضوع دة ما ينسكتش عليه 00 يا إما إنا اتا اللىجننت00 يا الحتة دى مسكونة 00 ( تدخل خضرة 00 ) الواحد أسلم له أنه يشوف له حتة تانية( لا يشعر بخضرة ) ما بقيتش قادر أستحمل00 خلاص ما بقا ش فيا أعصاب00 طول ما سى خليل عمال يطاردنى00 لا عارف أخلص من شكله ولا من مطالبته ليا بالفلوس كل شوية00 موش هااقدر أستمر00 أشوف لي حتة تانية 00 أهو على الأقل أعصابي هتكون مستريحة وأقدر أذاكر00 ولا اصطبح ولا أمسى بوش سى خليل خضرة ( تضرب صدرها بيديها ) ياخبر ياسى مختار00 تسيبنا وتمشى مختار (يتنبه الى خضرة )مين 00 خضرة000 انتى هنا من امتى خضرة من ساعة ما نويت تسيب الاوضة وترحل مختار زهقت يا خضرة 00 الحال موش زى الأول وأبويا من زمان ما بعتشى فلوس 00 وخليل كل شوية بيطالبنى ويهددني بالطرد00 واادانى مهلة لحد بالليل00 وان ما دفعتش هيطردنى من الاوضة خضرة ودي تيجى برضة يا سى مختار00 والله لو بايدى ما كنت اسيبك مختار كتر خيرك يا خضرة خضرة ( مترددة ) 00 فيه حاجة كنت عاوزة أقول لك عليها مختار فيه أيه خضرة ( مترددة ) أن أنا 00 أنا مختار مالك خضرة أنا حامل مختار حامل 00 ازاى خضرة أنا نفسي موش مصدقة

مختار

من امتى

خضرة

من تلت شهور

مختار

وهتعملى أيه

خضرة

أنا جاية لك عشان كده

مختار

مافييش قدامك غيرانك تنزليه

خضرة

واهون عليك 00انتموش وعدتني بالجواز

مختار

بس موش الوقتي

خضرة

أمال امتى

مختار

عما أتخرج واخد الشهادة 00 وبعدين اشتغل

خضرة

أكون اتفضحت وسيرتي على كل لسان

مختار

ماهو تكوني اتخلصتى من اللي في بطنك

خضرة

لا 00 موش هنزله

مختار

اسمعي الكلام00 وكل شيء هيتصلح

خضرة

قول انك بتتهرب منى 00 قول إنك موش عاوز تتجوزنى00 ما هو أنا ما أشرفشى إني أكون مرات مختار بيه

مختار

أنت فاهمة غلط

خضرة

قول انى كنت مخدوعة فيك00 وضحكت عليا بالكلام وعملت لى البحر طحينة لغاية ما صدقتك وسلمت لك نفسى00 وشلت فى بطني تمن خداعي

مختار

افهمينى بس يا خضرة

خضرة

أفهم أيه 00 روح منك لله 00 حسبي الله ونعم الوكيل 000 وربنا ينتقم منك

مختار

خضرة

خضرة

وديني مانى سايباك وها دفعك التمن غالى يا مختار

مختار

خضرة 00 ( تنصرف خضرة 000 )

مختار

( يضرب كفا بكف ) والعمل 00 أنا ما كنتش عامل حسابي لحاجة زى كده 00 أنا كده حساباتي اتلخبطت00 وكل ما اخلص من ورطة أتحط في التانية 00 واهرب ازاى من المصايب اللي عمالة تهل ورا بعضها00 مصيبة الإيجار المتكوم00 والراجل اللي عمال بيطارد فيا 00 وموش عارف هاجيبله فلوسه منين00 أطفش قبل ما ما يطب عليا 00 وأروح فين والامتحانات على الابواب00 ولو أنا ما عملتش كده خليل هيرمينى في الشارع00 وياريت على أد كده00 دا ممكن يعمل حاجة وأروح فيها 00 ما هو قادر على الرغم من انه عجوز00 ( يضع يديه على رأسه 00 ) آه 00 والمصيبة التانية اللي مستنيانىوموش عارف دى كمان هاعمل فيها أيه00 واهرب منها ازاى00 وإذا استنذلت وهربت منها 00 هااقدر اهرب من ضميري 00 ( يبتسم ابتسامة ساخرة 000 يتجه الى داخل الحجرة 00 ويجلس على المكتب 00 يفتح احد الكتب 00 يغلقه 00 ينهض 00 يسير حائرا في الغرفة00 ويبدو عليه القلق كالعاجز الذي لا يستطيع أن يفعل شيئا ويضرب كفا بكف00 يسترخى على السرير 00 يعقد يديه أسفل رأسه 00 يقبل عم خليل 00 ويطرق على باب الحجرة بشدة على غير المعتاد 0000 يقوم مختار ليفتح الباب ) وده مين دا كمان اللي عمال بيضرب الباب جامد كده

عم خليل ( يدفع الباب بشدة ) أنا

مختار

موش تستني لما افتح لك يا عم خليل

عم خليل

ملكي وانا حر فيه00 جبت الفلوس

مختار

الفلوس جاهزة

عم خليل

يالله ناولني

مختار

تستريح الأول وتشرب كوباية شاي

عم خليل

أيه لهجة الحنان دى

مختار

يا سلام يا عم خليل 00 أنا ليا كام عم خليل00 ( يصب الماء في البراد 00 ويضعه على الوابور 000 )

عم خليل

أنا ما باكلشى من الاونطةدى 00 ناولني الإيجار خلينى أغور

مختار

والله ما أنت ماشى إلا لما تشرب الشاي

مختار ( يصب الشاي في الكوب ويناول عم خليل 000 ) الشاي المتين

عم خليل

متشكرين يا عم ع الشاي 00 فين الفلوس بقى

مختار

مستعجل على أيه

عم خليل

كلمه واحدة وموش هتنيها00 الفلوس

مختار

وإذا قلت لك ادينى فرصة

عم خليل

( يقذف الشاي في وجه مختار000 يحاول مختار تفاديه 00 لكنه يغرقه تماما00 وينظران شذرا الى بعضهما لفترة طويلة 00 ويفكر مختار في شيء كأنه يتولى على شر 000 يتجه ناحية المنضدة وينتزع سكينا ويغرسها في صدر خليل مرات عديدة000 يقع خليل على الارض00 والدماء تسيل منه بغزارة00 يئن أنات متقطعة وفى نفس الوقت يسمع دقات طبول خارج المسرح لتعبر عن التوتر00 ويشهق عم خليل بشدة 00 يموت 0000 )

مختار ( ينزع السكين من صدر خليل 0 يصيبه الوجوم 00 ولا يصدق ما حدث )

مختار

معقول أيه اللي عملته00 بقيت قاتل00 مستحيل 00 لا 00 لا000 قاتل 00 موش ممكن 00 وها تصرف ازاىفى البلوى دى( يشير الى جثة خليل الغارقة فى دمائها000 ) وهاوديها فين 00 رحت في داهية يا مختاروهتتشنق 00 اتشنق 00 لا 00 لا00 موش عاوز أموت ( يفكر في أين يخبى الجثة )وبعدين 00 ( صوت الطبول يدق بعنف 00 وكلما ازدادت حيرة مختار يزداد دق الطبول 00ويسير جيئة وذهابا ) أرميه فوق السطوح قدام الاوضة 00 لا 00 دا أنا أكون أول المتهمين00 وأروح في سين وجيم 00 لازم أخفى الجثة 00 أخبيه فين 00 أخبيه فين 00 الدولاب 00 لا ما ينفعش 00 تحت السرير000( يسحب الجثة أسفل السرير0 يرفع الملاءة 0 ويمسح الدماء من السكين 00 يصلح من ترتيب الحجرة)

مختار

( يتنفس الصعداء ) 00 يااااه كل ده حصل00 ازاى 00 موش فاهم00 بقيت قتال قتلة وضاعت أحلامك يا مختار00 ( يمتلئ المسرح برجال مدججين بالسلاح00 طرق شديد على باب الحجرة ومعهم ضابط شرطة بملابس مدنية

الضابط

افتح يا مختار يا نبوي 00 المكان كله محاصر 00 ما تحاولش تهرب لان المكان كله محاصر

مختار ( ساكنا لا يتحرك 00 ينظر من الشباك )

هي الشرطة لحقت تعرف ، ما فييش فايدة ( يفتح الباب يدخل الضابطووبعض الجنود )

مختار

أنا هااقول كل حاجة 00 هاعترف يا حضرة الضابط

الضابط

الإنكار موش هيفيدك 00 كل زمايلك اعترفوا

مختار

وهم يعرفوا منين

الضابط

كنا مراقبين تحركاتهم00 والأحسن تيجى معانا 00 وما فييش داعي للإنكار

مختار

أنا هاعترف 00 أيوه أنا اللي قتلت وها قول على مكان الجثة

الضابط ( كأنه لا يفهم شيئا ) 00 ورينى

مختار

( يتجه ناحية السرير 00 ويرفع الملاءة00 ويسحب الجثة للخارج 0جثة حريمه 00 ده من اختصاص المباحث الجنائية ( ينادى أحد المساعدين 00 ) يا ممدوح اتصل بالمباحث الجنائية

مختار

أمال انتوا مين

الضابط

إحنا مباحث امن الدولة وجايين نقبض عليك بتهمه التعاون مع الجماعات الإرهابية والاشتراك في احدي عمليات التفجير

مختار

لا يفهم شيئا ) جماعات إرهابية 00 عمليات تفجير 00 مباحث أمن الدولة 00 أنا موش فاهم حاجة

الضابط

أتحفظوا ع الجثة وخللي معاها اتنين عساكر لغاية ما تيجى المباحث تحقق

مختار

( كأنه لا يصدق شيئا 00 يضع يده على رأسه 00 يخرج الضابط من اليسار 000000 الطبول تدق بعنف 00 مع ضحكات عالية من خارج المسرح00 ويزداد دق الطبول بعنف والضحكات تتوالى 0000 ويسدل الستار تدريجيا 0000 )

ستار

الثلاثاء

3 جمادى أول سنة 1442 ه

24 يوليو سنة 2001 م

عطا درغام

إللي يخاف من العفريت

إللي يخاف من العفريت

رد: إللي يخاف من العفريت

رد: إللي يخاف من العفريت

رد: إللي يخاف من العفريت

رد: إللي يخاف من العفريت

رد: إللي يخاف من العفريت

رد: إللي يخاف من العفريت