يوم صعب جدا......!

[b]المشهد الثاني
المنظر السابقالكمساري
يا جماعة خلاص الموضوع انتهى والنشال غار فى داهية 000 (يتحرك الأتوبيس 000 ) الأصوات
استنوا 000 استني يا أسطى 000 ( تنبعث صوت أغنية من كاسيت الأتوبيس 0000 وكأنه لم يحدث شيئا 000 )الكمساري
أيوه تذاكر00 مين اللي ما دفعشى00 ( يشير إلى الأمام000 ) آنت يا أخينا ياللى داخل قدام
( الراكب يناول نقود للجالسين على الكرسي الأمامى000 ) والنبي ناول الكمساري 00 ( يتناول الركاب النقود 00 حتى تصل الى كمسرى ويعطيها الراكب المجاور للكمسارى00ويتناول الركاب التذكرة حتى تصل للراكب 00 ويسمع صوت راكب يصرخ 000 )
الراكب
فلوسي ، أنا ضعت00 نشلوني 00 دا أنا لسه قابض المرتب يا ناس 0 هاعمل أيه
الكمساري
مالمخبر كان موجود لما مسك الحرامى
الراكب
واشي عرفني إن أنا اتنشلت
الكمساري ( للركاب )
فتشوا جيوبكم انتوا كمان لحسن يكون علم عليكم انتوا كمان
صوت آخر
دا أنا كمان اتنشلت00 وقف يا اسطى00 استني
صوت ثان
وأنا كمان 00 امسكوه ابن الهرمة ده
الكمساري
عوضكوا على الله00 ومنهم لله ربنا يخرب بيتهم
راكب
وهنعمل أيه الوقتي
الكمساري
هتنزل تقدم بلاغ في القسم00 لحد ما يتعرفوا ع النشال
الراكب
استني يا أسطى وقف
( يتوقف الأتوبيس 00 ركاب تنزل وركاب تصعد 0000 )
الكمساري
وسع يا أخويا 00 مكان للي داخل 00 ( تصعد سيدة تحمل طفلا
السيدة ( لراكب جالس )
والنبي يا أخويا قعدني لأحسن العيل اللي على ايدى
الراكب
وأنا مالي يا ست
( تتقدم السيدة الى راكب آخر 00 ) ممكن تقعدني لو سمحت
الراكب
وأنا مالي
راكب آخر
قدر دى أمك ولا أختك00 ولا حتى بنتك
الراكب الجالس
وأنت مال أهلك أنت 00 هي كانت جابتك لها محامى
الراكب الواقف
يا اخى بدافع الإنسانية
الجالس
وفر إنسانيتك لنفسك00 وخليك في حالك أحسن لك
الواقف
هتعمل لي إيه يعنى
الجالس
( يلكمه في وجهه )
الواقف
آي بتضرب 00 خد 00 ( يلكمه هو الآخر 00 يشتبكان 00 يتدخل راكب ثالث ويفصلهما عن بعضهما 000 )
الكمساري
أنت ياعم آنت وهو 00 ما تتلموا بقى واصطبحوا لنا عالصبح في الشغلانة الهم00 ربنا يتوب علينا منها 00 ما خلاص بقى يا اخوانا00 أنت يا كابتن ما تقعد مكانك 000 ( يجلس الراكب مكانه00 ويبتعد الراكب الواقف قليلا 000 )
راكب ثالث ( يشير للسيدة ) تعالى يا ستى اقعدي
السيدة
ربنا يصلح حالك 00 الله يخليك 00 دى الدنيا لسه بخير
الواقف
ولا يهمك ولاد الحلال كتير
الكمساري ( يطرق على المنضدة الصغيرة إمامه )
الأخ اللي داخل قدام 000 ( يصعد راكبان من الأمام ويشهر احدهما سلاحه في الأتوبيس من الأمام في وجه الركاب 000 )
المسلح
كل واحد يقعد مكانه وما يتحركش
راكب
أيه فيه أيه
راكب آخر
إيه اللي حصل
صوت ثالث
فيه أيه يا إخوانا
صوت رابع
يادى النهار اللي موش معدي
المسلح
ماحديش يتحرك من مكانه
راكب
ما تقولوا لنا يا جماعة فيه أيه
اللص المسلح
شوف شغلك يا ويكا
ويكا
كل واحد يطلع اللي معاه من غير مشاكل
الكمساري
معناته أيه الكلام ده
المسلح
اللي موش عاجبه مافييش غير كده 000 (0 يضرب رصاصة فى الهواء00 هرج ومرج في الأتوبيس 00 صراخ نساء 00 يصوب اللص المسدس ناحية السائق 00000 )
يالله امشي على طول وما توقفشى وإلا هافرغ المسدس ده في دماغك00 مفهوم
السائق
(يرتعد )
آه 00 مفهوم
راكب
ما تقولوا لنا يا جدعان فيه أيه
المسلح
خلصنا قوام يا ويكا 00 ما فييش وقت
ويكا
حاضر يا كيمو 00 استعنا ع الشق بالله 000 ( يمر بين الركاب ويبدأ بالصف الأيسر خلف السائق00 ويبدأ بفتى يبدو انه طالب 000 )
ويكا ( يشهر مطوه في وجهه )
طلع اللي في جيبك ياد
الفتى
صدقني والله ما معايا فلوس 00 وأنا لو كان معايا فلوس ما كنت ركبت تاكسي
ويكا
هتكذب عليا يا روح أمك 00 ما ما ماعلمتكش اللي يكدب يروح النار ( يمد يده في جيبه ويفتشه ويعثر على نقود 00 ) أمال إيه ده ياله
الفتى
أرجوك دى موش فلوسي 00 دى فلوس الدرس اللي هوديها للأستاذ 00 ماما باعت الدهب بتاعها عشان تديهم لى
ويكا
ولازم الدروس 00 قول لماما وقعوا
الفتى
موش بتقول الكذب حرام يا عموك
ويكا
هتهزر معايا ياله
الفتى
أبوس ايدك
ويكا ( يدفعه )حركة تانية هأجيب كرشك
راكب
خللي في قلبك شوية رحمة
ويكا
سيبنالكوا الرحمة يا اخويا
كيمو
موش عاوز حركة وإلا هاخلص عليكوا واحد واحد 00 أنا موش باقي على حاجة
راكب
ارحمنا يا ابني
كيمو
ارحمونا انتوا وطلعوا اللي في جيوبكم إن كنتوا عايزين تنفدوا بجلدكم
أصوات
ده حرام 00 ده ظلم 00 دى سرقة بالإكراه 00 سرقة فى عز الضهر 00 هي سايبة 00 فين الأمن 00 فين الحكومة
كيمو
( يضرب طلقة في الهواء ) خلاص00 موش عاوز ولا كلمة00 كلامي صريح 00 اللي عاوز يروح سليم لبيته وعياله ما يلاوعشى ويطلع اللي معاه من غير ما يقاوم 00 يالله يا ويكا شوف شغلك وما تضيعشى وقت( يتجه ويكا لراكب آخر ويشهر المطواة فى وجهه 00 ) أنت يا أخينا ما أحناش فاضيين
الراكب ( يخرج مافى جيوبه )
هم دول اللي معايا بس
ويكا ( ينظر فيهم ) خمسة جنيه بس ( يفتشه00 يرميهم له ) خليهم لك يا اخويا يمكن ينفعوك في وقت زنقة ( يتجه لراكب آخر )

ويكا
اللي معاك بسرعة
الراكب
الله لا يسيئك ما معياش غير فلوس الدوا دول اللي جايبهم بالعافية بعد ما مديت ايدى للي يسوى واللي ما يسواش
ويكا
وأنا مالي 00 طلع يا راجل
الراكب
أبوس ايدك00 أنا تعبان والفلوس دى جبتها بالعافية
ويكا
وأنا مالي ( يخطف الفلوس منه )
الراكب
ربنا ينتقم منك
ويكا
الله ما تخليك كويس
الراكب ( يبكى )
حرام عليك منك لله
راكب آخر
لا يمكن تكون بني أدم
ويكا
إخى ع الرجالة... بتعيط عشان اخدت منك الفلوس
راكب آخر
وانتوا عاجبكوا العمايل اللي بتعملوها دى
كيمو
سيادتك بتوجه الكلام ده لمين
الراكب
أكيد ليك طبعا
كيمو
ما يعجبنيش ولا عمره يعجبنى00 قول لي البديل أيه ودلني عليه
الراكب
ودي عاوزة كلام الشغل طبعا
كيمو
الشغل كلمه نسيتها من زمان 00 زمان قوى
الراكب
وهو الشغل عيب
كيمو
ومين قال انه عيب 000 عمر الحلال ما كان عيب
الراكب
أمال أيه اللي دفعك لكده
ويكا
إيه يا عم هتفتح لنا تحقيق00 عاوزين نشوف شغلنا
كيمو
شوف شغلك يا ويكا وبطل غلبة
ويكا
ايوه معاك حق الوقت يسرقنا وعاوزين نخلص
الراكب
ما تقدر يابنى ظروف الناس الصعبة دى
كيمو
وهو حد كان قدرنا ولا أخد بايدينا
الراكب
في ايدك تبدا بدل اللي أنت فيه
كيمو
اشتغل إيه
الراكب
اى شغلانه شريفة
كيمو
جربت كل الأبواب لقيتها مقفلة فى وشى00 طلعت بره 00 وكل ده ما فلحتش
الراكب
يمكن العيب فيك انت
كيمو
العيب فيا 00 ياريت كان فيا 00 وإلا ما كانش ده بقى حالي وبقيت نشال بالإكراه
الراكب
بايدك تبدا من جديد
كيمو
صعب يا سيد 00 زى اللى كانى دخلت فى سكة غلط مافييش منها رجوع ( يسمع صوت صراخ رجل 00000 )
الرجل
حرام عليك 00 ده يا دوب لسه قابض مرتبي 00 سيبهولى الله يخليك00 أبوس ايدك00 دا أنا عليا أقساط ياما 00 هاروح فى داهية
ويكا
واشمعنى احنا اللى نروح فى داهية لواحدنا 00 هو انت أحسن مننا وإلا احنا أولاد ستين فى سبعين
الرجل
ليه بس يابنى اللى بتعمله فينا ده ،أنا ورايا التزامات وكوم لحم 00 سب لى حاجة الله لا يسيئك
ويكا ( يدفعه ) ابعد ايدك أنا موش ناقصك
الرجل ( يبكى )
ربنا ينتقم منك 00 الهي لا يكسبك يا شيخ
ويكا
وهو كل واحد آخد منه شوية ملاليم يعيط ويعمل لى عيشة00 دى شغلانة عيا أوى يا كيمووما عديتشى بتجيب همها زى الأول 00 فين زمان لما كان الواحد يطلع بشيء وشوياية00 كانت الناس متريشة00 اماالايام دى يا حسرة 00 زى اللى كان ما حدش عاوز يشيل فلوس00 حتى الواحد فكر انه يتوب ويقعد يكتب مذكراته
راكب ( يستهزئ ) مذكراتك فى النشل والسرقة
ويكا
يا عم اتنيل 00 طلع اللى معاك
الراكب
منين يا حسرة 00 ما ما عييش غير السعد والهنا00 0 يخرج جيوبه 00 فارغة تماما ) يادوب حق التذكرة دفعته وع الحميد المجيد00 واحد محترم زي حضرتك استلفهم بالإكراه
ويكا
اتنشلت يعنى
الراكب
بالضبط وما فييش الا انا قدامك بطولي
ويكا
وأنا هاعمل لك ايه
الراكب
شغلني معاك
ويكا
يا اخى اتنيل ودور لك على شغلانة تنفعك وهو ما عتشى ألا انت
الراكب
جربني
ويكا
هو الكار هيلم00 اقعد بلا وجع دماغ
كيمو
يالله خلصنا يا ويكا
ويكا
هوا هوا يا كيمو 00 ما عدشى الا نص الاتوبيس00 ( يتوقف الأتوبيس فى الإشارة 0000 )
كيمو
لازم تقف
السائق
عاو زنى اكسر الإشارة وأروح فى داهية
كيمو
كل واحد مكانه00 وموش عاوز ولا حركة00 اللى عاوز تذكرة لجهنم ما فييشس مانع00 خليك واقف يا ويكا وما تعملشى اى حاجة عشان ما تلفتش الأنظار
راكب
أيه يا اخوانا 00 واللي عدى محطته0000 واللي عاوز يروح
كيمو
الظاهر إن انت عاوز تغور خالص من الدنيا 00 تسمح تنقطنا بسكاتك
الراكب
وهنسكت لحد امتى وانتوا عمالين تتحكموا فينا
كيمو
احنا ما بنتحكمشى فى حد يا حبيبي 00 ها مهمة محددة وخلاص 00 اللى معاه يشترى روحه واللي ما معهوش يخرس خاص 0000 (يلاحظ كيمو صعود ركاب من الباب الخلفي ويشير للسائق 00 ) اقفل الباب الورانى وإلا هافرغ المسدس ده فى نافخوك ( يغلق الباب الخلفي 00 ويتحرك الأتوبيس )
راكب
يابنى اعتقنا لوجه الله 00 احنا عملنا لك حاجة00 احنا ورانا اشغال0000 ( يسمع صوت رجل صعيدي 000 )
الصعيدي
واه يا بوى انتوا بتعملوا فينا كده ليه يا ولد العم00 ما تعتجونا بجا 00 والله ما انا عارف انا ها الاجى العلوان ازاى اللى اداهولى ولد العم سليم 00 ما توجف يا سيدنا الأسطى 00 هي محطة غمرة عدت ولا لسه
راكب
غمرة مين يا بلديات00 دى عدت من زمان
الصعيدي
باه 00 واعمل أنا أيه دى الوكيت 00 يا نهار مطين يا عويس00 هتروح فين وتعمل ايه00 يا شماتة البجاروة فيك 00 جلت أروح مصر واشتغل00 وأجيب فلوس كتير وابجى زى الواد شتيوى ابن أبو مندور 00 وأشترى أرض ياما وابني لى حتة بيت بالسمنت المسلح بدل البيت الطين00 وكل ده يروح فى غمضة عين00 وما خبرش أنا فين دى الوكيت
راكب
اهدي يا بلدينا وكل شيء هيتحل
الصعيدي
وهيتحل كيف 00 وانا وجعت فى اللى حذروني منيته هناك فى الكفر 00 يا شماتة أبو مندور فيك يا عويس
ويكا
شوف لنا حل يا كيمو فى الواد ده بدل ما يعمل لنا مشاكل
كيمو
فتشه الأول
الصعيدي
واه 00 تفتشوني ليه وبتاع أيه 00 دا موش هيحصل ولا على جثتى000موتنى عاد أمال ولا انك تفتشني
كيمو
طلع اللى معاك ياد
الصعيدي
بتجول يا ولد00 الولد ده بيلعب امعاك فى الشارع اهناك عنديكوا 00 موش أنا اللى تجول لى كديه
ويكا
باقول لك خلصنا منه يا كيمو00 ما بناقص يا عم اللى معاه 00 تلاقيه أجرب ما حيلتوش اللضى
الصعيدي
باه 00 انت بتشتمنى إياك 00 الصعيدي طول عمره جيبه عمران00 ومعاى الجرشنات اللى بعت بهم الجاموسة والجيراطين اللى حيلتى
راكب
الله يخرب بيتك وديت نفسك فى داهية
ويكا
ما لكش دعوة ( يقترب من الصعيدي ) طلع الجرشنات اللى معاك
الصعيدي
باجول لع 0( يفتشه ويكا 00 يدفعه الصعيدى00 يقع ويكا على الارض00 يمسك ويكا قدمه00 يركله الصعيدي 00يقع ويكا ثانية00 يخرج الصعيدي خنجرا من الصديرى00 ويهجم على ويكا 00 يلحظه كيمو00 يضرب رصاصة فى الهواء 00 يرتعد الصعيدي فيقع الخنجر على الارض00 يدوس ويكا على الخنجر
00 يدفعه الصعيدي على الأرض 000 صراخ نساء00 أصوات)
الأصوات
نزلونا 00 احنا فين 00 دى فوضى 00 ما فييش حكومة والناس دى طايحة فينا م الصبح
( يلملم ويكا شتاته ويلكم الصعيدي فى وجهه00 يقع الصعيدي على الأرض 00 يلتقط الصعيدي الخنجر ويطعن ويكا فى صدره00 يصرخ ويكا يجرحه ويكا فى ذراعه 0000 )
ويكاا ( يصرخ 00000)آه بتضربنى يابن الهرمة ( يضع يده على صدره )
الصعيدي
( يتلفت يمينا ويسارا يحاول الهروب من الباب الخلفي 00 وهو يتأوه من الجرح الذي فى ذراعه 00000 )
كيمو ( للسائق )
اوعى تفتح الباب
الصعيدي ( يطرق الباب ويحاول فتحه 00 يضرب كيمو رصاصة فة الهواء 00 تطيش الرصاصة وتصيب احد الركاب 00 )
الراكب
آه00 آه
راكب آخر
احنا فى غابة
امرأة
حرام عليكم اللى بتعملوه فينا ده 00 خدوا كل اللى انتوا عاو زينوا وسيبونا فى حالنا
ويكا
الظاهر انى هاموت ياكيمو00 خللي السواق يقف لما نشوف لنا حل فى المصيبة اللى احنا فيها دى
صوت
الناس سايحة في دمها00 على اقرب مستشفى يا اسطي
كيمو
امشي على طول يا اسطي ما لكش دعوة
( يقف أحد الركاب ويصرخ في كيمو 000 )
الراكب
ما تخللي في قلبك شوية رحمة
كيمو
سبت لك الرحمة يا اخويا 00 اقعد ياله
الراكب
اتلم أحسن لك 00 أنت موش عارف بتكلم مين
كيمو
هكون بكلم مين يعنى 00 جورج بوش
الراكب
ما تتمهزاش واتلم بدل ما ألمك
كيمو
نازل فيا تهزي ئمن الصبح وساكت لك 00 هتكن مين يعنى
الراكب
حكومة
كيمو ( يضحك )
حكومة سلامات يا حكومة 00 وفين يا سيدي الحكومة من زمان 00 ما نشوفهاش الا بعد المصيبة ما تحصل 00 لو كانت الحكومة بصت لنا بعين الرحمة00 ما كانشى ده بقى حالي ولا حال ويكا اللى مرمى قدامنا الوقتي بين الحيا والموت00 أتخرجنا من زمان 00 قول عشر 00 خمستاشر سنة 00 ونسيتني القوى العاملة00 لا حول ولا قوة 00 استني يابنى دورك00 وسنة ورا سنة00 وقالوالى جرب حظك وشوف لك عقدوا طلع بره 00 طلعت العراق ويا حسرة قامت الحرب ورجعنا من هناك00 أيد ورا وأيد قدام 00 استني برضة00 أدونا ورقة صغيرة00 وقالوا لي استني دورك00 قالوا الحكومة هتوزع ارض عالخريجين00 حاولت 00 قدمت 00 وقالوا استني دورك00 ومرة تانية قالوا الحكومة هتدى قروض للشباب 00 وادونى قرض بعشر تلاف جنيه 00 يا حسرة هاعمل بيهم ايه00اتجوز بيهم ولا أحطهم فى مشروع00 ودخلت فى مشروع 00 وفشل فشل ذريعة 00 أتعثرت فى السداد 00 واتحكم عليا بسنتين سجن00 واتعرفت على ولاد الحلال بعد ما السكك اتقفلت في وشى وبقيت زى مانت شايف نشال محترم
المخبر
بايدك تتوب وهنساعدك
كيمو
تساعدني على إيه يا اخويا من هنا عالسجن طوالى00 ياميت خسارة00 ما عتشى ينفع يا باشا
المخبر
صدقني هنساعدك
كيمو
بعد البلاوى دى كلها00 ياريته كان ينفع


ستار[/b]

[b]المشهد الثالث
نفس المنظر السابق
( يتقدم المخبر الى مقدمة الأتوبيس )
كيمو
خليك عندك هضرب في المليان
المخبر
ما تخافشى 00 هات المسدس اللي معاك
كيمو
باقول لك أقف عندك ما تتحركشى ( يلحظ كيمو يد الرجل المثبتة على يساره00 يضغط على الزناد00 يسرع المخبر بالتقاط المسدس ويناول كيمو رصاصة في راسه00 ويترنح كيمو يمينا ويسارا 00 ويضغط على الزناد 00 رصاصات طائشة في الهواء00 صرخات تتعالى 00 يقع كيمو على الأرض 000 )
كيمو
خلاص كل شيء انتهى
ويكا
هي دى نهاية الطريق البطال
الصعيدي
واه 00 كان مستخبى لي فين كل ده يابوى 00 وأنا كان مالى00 وكنت في بلدنا عايش ومرتاح بازرع ارضي 00 لكن يا حسرة كل ده راح00 وحلمت انى آجى مصر00 وما اعرقشى إن ده هيحصل لي
المخبر
يالله ياسطى على أقرب مستشفى بسرعة
السائق
أمشى عدل على أقرب مستشفى 00 ما نروح القسم أحسن
أصوات مختلفة 00
كفاية لحد كده 00 موش عاوزين نموت 00 العمر موش بعزقة
السائق
ما ترسو لنا على بر 00 نقف ولا نروح المستشفى00 ولا أيه بالضبط
المخبر
باقول لك نحاول ننقذ دول الأول قبل ما يموتوا
ويكا
( في نفسه ) فيها سين وجيم وهلبس القضية لوحدى 00 لازم أكفر عن غلطتي واعمل حاجة حلوة لوحدى قبل ما أموت 00
انتوا يا ناس00 ما تزعلوش منى 00 السكينة كانت سارقانى والوقتي أنا بين الحياة والموت00 أرجوكم تسامحوني واللي ليه فلوس هياخد ها ( هرج 00 ومرج في الأتوبيس 000 تحدث فوضى في الاتوبيس000 يهجم الركاب على ويكا )
أصوات مختلفة
فلوسنا 00 فلوس الدروس 0.0 مرتبي اللي باستناه 00 فلوس العملية 00 فلوس العلاج00
ويكا
واحدة 00 احدة 00 هتموتونى00 يا ناس ياهو 00 هتخنق 0.0 كل واحد هياخد فلوسه 0000 ( يهجمون عليه00 يفتشون جيوبه 00 )
المخبر
سيبوه بقى 00 بلاش الفوضى دى 00 كفاية كده
راكب
هما خلوا فينا حاجة 000 دول حقتهم يتقطعوا حتت
المخبر
خلاص كل واحد هياخد فلوسه ( يضيع صوته وسط الصرخات والأصوات 00 ) يا ناس 00 يا هو 00 يا عالم ( لا يستطيع ويكا أن ياخذ نفسه00 يتقطع صوته 00 يضيع صوته 000 يشهق 00 لا يرحمه الركاب 0000 يموت 00 )
المخبر
( يضرب نار فى الهواء 000 ) خلاص 00 كل واحد يقعد مكانه 00 هضرب فى المليان 00 اطلع بسرعة يا اسطي ( يعود الركاب الى اماكنهم00 ويكو كيمو غارقين في دمائهما 00الصعيدى يضع يده على ذراعه00 لكن إصابته طفيفة لا خوف منها000 وهناك راكب آخر يتألم من الجرح 00 ويربط ذراعه بايشارب إحدى الراكبات 0000 ) الصعيدي
والنبي تسرع يا سيدنا الأسطى لأحسن أنا دمى اتصفي وحاسس انى ما عتشى عندي دم 000 ( ضحكات من الركاب 000 )
راكب
دمك تقيل شوية 00 خليه يخف شوية
الصعيدي
هم يضحك وهم يبكى 00 فايج ورايج يا أخوى
الراكب
من قرفنا يا خويا 00 حد كان يحصل له اللي حصل لنا النهار ده 00 بعد ما دمنا نشف في جلدنا00 ده كأنه فيلم سيما00 آه والله يا جدع
(المخبر يفتش جيوب ويكا ولا يجد شيئا 00 )
المخبر
اللي أخد فلوس أو اى حاجة من ويكا يجيبها هنا على بال ما نروح القسم والتحقيق هياخد مجراه00 وكل واحد هياخد فلوسه00 ( لا يتحرك أحد 000 ) كلكوا ما أخدوش حاجة00 موتوا الراجل بعد ما اخدتوا منه الفلوس
أحد الركاب
موتناه 00 وإلا هو وصاحبه اللي موتونا من الخوف وخلا كل وحد يخاف على نفسه00 وما عدناش عارفين هنموت ولا هنروح لعيالنا لغاية ما كان جزائهم من جنس عملهم00 ربنا يرحمهم
راكب آخر
مين المسئول عن اللي بحصل00 الظروف ولا إحنا ولا مين بالضبط 00 البطالة ولا المعيشة اللي بقت صعبة00 كل واحد يرمى بلاويه على التانى ويدور على شماعة يرمى عليها أخطائه ويا عالم ممكن اللي حصل لنا النهار دة ممكن يحصل في أتوبيس تانى000
راكب آخر
ممكن يحصل في أتوبيس وقطر أو حتى طيارة00 طول ما الناس محتاجة00 طول ما الغلا عمال ينهش والناس موش قادرة تجاريه00 دى الناس تعبت وبقت تاكل في بعضها طول ما الظلم ساير بين الناس
المخبر
خلاص نقطونا بسكاتكم
الراكب
حتى أنت كمان عاوز تبطلنا الكلام00 سيبنا نتكلم000 سيبنا نتنفس 00 سيبنا نشم هوا نضيف مرة00 بدل الخنقة اللي إحنا فيها00 لا عارفين نقول حاجة ولا عارفين نتكلم000 موش قادرين نقول لا ولو لمرة واحدة 0000 ( يتوقف الأتوبيس 000 يسرع الركاب في النزول
الكمساري
على مهلكوا000 الصبر ( يخلو الأتوبيس من الركاب ما عدا المخبر والسائق والكمسارىوالصعيدى والراكب المصاب 00ويصعد رجال الإسعاف لحمل جثث الموتى والمصابين 000)الكمساري
خد المصابين الأول ( يشير ناحية الصعيدي والراكب المصاب 000 )
الصعيدي
آه والنبي لأحسن دمى اتصفي 000 ( يرفعه العامل الأول على النقالة00 ينزلان من الاتوبيس00 يغيبان لفترة قصيرة ثم يعودان0000 )
العامل الأول
وهو إيه اللي حصل بالضبط
السائق
ما تحطش في بالك 00 دول ركاب كانوا بيهزروا مع بعض
العامل الثاني
ويبهدلوا بعض بالشكل دة
الكمساري
هزار آخر زمن
العامل الأول
يالله ياعم وإحنا مالنا00ما لناش غير شغلنا 000000 ( ينزل السائق والكمساري من الأتوبيس وتصاحبهم موسيقى حزينة حتى نزول الستار 0000 )
ستار
بورسعيد في 7/7/2002
عطا درغام[/b]