الجمهور عاوز كده

المشهد الأول
فى صالون منزل يحتوى على أثاث حديث00 حيث يدخل محمود من الناحية اليسرى000
محمود
آه 00 الواحد تعب من الشغل00 يا ما نفسي أرتاح00 ( ينهض لفتح التلفزيون 00 ثم يجلس على الأريكة 00 يسمع صوت إعلانات )إعلانات 00 إعلانات فلقتونا00 حرام عليكم عاوزين نشوف الفيلم 00 0 تظهر المذيعة على الشاشة
المذيعة
وأنت مالك يا بارد00 نشغل إعلانات 00 ما نشغلشى00 دى حاجة ترجع لمزاجناوانت تتفرج وبس 00
محمود
( يتلفت حوله يبحث عن مصدر الصوت 000 )هو الصوت ده جى منين
المذيعة
م التلفزيون يا فالح
محمود
م00 ت00 ت00 ت00 ت00 لفززز يوون
المذيعة
أيه فيه مانع
محمود بس إزاى
المذيعة
زى مانت شايفنا وسامعنا وعمال تبرطم00 إحنا كمان شايفينك وسامعينك
محمود
ياااه طب قولي لي
المذيعة
لا أقولك ولا تقول لى00 سيبنى الوقتي أشوف شغلي
محمود
طب إسمعينى
المذيعة
موش فاضيالك00 ودي الوقتي سيداتي سادتي ونلتقي الآن مع السهرة الدرامية التائهون بطولة سامية احمد وخالد نبيه إخراج شوقي دياب
محمود
قولي لي السهرة دى حلوة ولا لا قبل ما أتفرج
المذيعة
ما اعرفشى00 أديك هتشوف وتعرف 00 ( تختفي المذيعة تدريجيا وتظهر مقدمة السهرة والأسماء على الشاشة ونسمع الموسيقى التصويرية0000 ) محمود طيب أتفرج00 اهو الواحد يسلى نفسه( ينادى على زكية زوجته ) يازكية 00 يا زكية ( تدخل زكية من اليمين ) زكية أيه 00 إيه 00 زلزال 00 زلزال
محمود
هو جرى أيه يا وليه 00 عليك عفريت اسمه زلزال00 الزلزال فات من زمان
زكية
أمال عاوز أيه يا حبيبي
محمود
خمسينة شاي أعدل بيها دماغي
زكية ( بدلال ) ما تقوم ننام ياراجل أحسن )
محمود
موش قبل ما أتفرج ع السهرة
زكية
أنت تعبان
محمود
ارفه عن نفسي شوية
زكية ( بدلال مكشوف ) قوم يا راجل
محمود
بأقول لك أيه موش عاوز شاي
زكية
ودي تجى هاعملك شاي ( تضغط على أسنانها ) وبعدين هأنام ( تنصرف زكية
محمود
يا باى 00 دى النسوان تزهق00 امتى يارب أرتاح بقى00لكن برضه الواحد ما يقدرش يستغنى عنهم00 ( ينظر ناحية التلفزيون
إخراج شوقي دياب 00 نشوف
( ينحسر الضوء تدريجيا ويتركز الضوء تدريجيا على غرفة نوم حديثة 00 )
قسمت
صابر 00 يا صابر00 اصحي بقى00 أنت اتاخرت عالشغل
صابر ( يقوم مفزوعا )
يا ستى حرام عليكى سيبينى نايم
قسمت
موش هتروح شغل بعد الضهر أنت اتاخرت عليه
صابر
موش هروح ياستى00 اخدت أجازة مفتوحة على طول
قسمت
ليه يا صابر
صابر
رفد ونى 00 ارتحتى 00 سيبينى نايم بقى
محمود
فالح ولقي لك عين تنام يابرودك يا اخى
صابر
أتفرج وأنت ساكت
محمود
حاضر
قسمت
ونعيش منين
صابر
شغل الصبح كفاية
قسمت
دا ما يكفييش ماهية السفرجى والجنايني والكوافير
محمود
يخرب بيتك
كل ده 00ده أنت باين عليك ارستقراطي
صابر
لا ارستقراطي ولا يحزنون 00 مراتى بس هي اللي طالعة لي فيها
محمود
امسك ايدك شوية00 وكمان مالوش لزوم السفرجى والطباخ وممكن توفر ماهيتهم ومراتك تقوم بالشغل ده
قسمت
أووه 00 موش ممكن00 دى كانت ما ما تطلقني منك فورا
محمود
أمك 00 أمك مافييش حد موادينى في داهية غير أمك ونصايح أمك
قسمت
مالها ما ما ياسى صابر00 موش هي اللي مجوزانى لك وموش هي اللي مكلما لك أنكل شادي عشان يشغلك
صابر
خلاص 00 خلاص 00 ماما00 ياسلام على ماما00 دى ملاك والله ملاك00 وطربة أمي فكيهة ملاك
محمود
فكيهة 00 أمك اسمها فكيهة
صابر
( يقذف محمود بالوسادة ) هو أنا ناقصك انت كمان 00 ( تدخل زكية )
زكية
الشاي يا محمود00 وإنا داخلة أنام ( تضغط على أسنانها )
محمود
لا ( تنصرف زكية )
صابر ( يعود لينام )
قسمت
هتنام تانى
صابر
عايز أنام
قسمت
ما بتشبعشى نوم
صابر
مهدود ليل نهار عشان سيادتك وطلبات سيادتك
قسمت
أديهم رفدوك يا فالح
صابر
أحسن عشان ارتاح
قسمت
قوم دور لك على شغلانه تانية
صابر
ما نعيش على أدنا أحسن
قسمت
وهى العيش دى عاجباك
صابر
ماحنا عايشيين
قسمت
لازم نأمن على حياتنا
صابر
مانا مأمن بخمسين ألف جنيه عليا وعليك
قسمت
ماهو لو حد مات فينا يا فالح التانى يقبض التأمين
صابر أموت أنا
قسمت
بعيد الشر يا حبيبي
( يسمع صوت التليفون من الصالون )
قسمت
ياترى مين اللي يتصل الوقت ده( تنصرف )
صابر
( محدثا نفسه ) قال أموت أنا وهى تقبض خمسين ألف جنيه00 وتتمتع بيهم مع واحد تانى 00 بعد ما سعادة البيه يغور من على وش الدنيا
محمود
ما تتخلص منها وترتاح
صابر
وأتخلص منها إزاى يافالح
محمود
إإقتلها
صابر
(مستهزئا ) عيني على الأفكار
محمود
آه والله بتكلم جد
صابر
وبعدين أتمسك وآخذ فيها إعدام
محمود
ما هو ممكن تخرج منها زى الشعرة من العجين
صابر
مافييش حد هيستفيد من موتها غيري 00 العب غيرها (( تدخل قسمت )اخرس بقى لا مراتى جاية
قسمت
أختي سوسن اتصلت بيا وبتقول لي إن ماما تعبانه قوى
صابر
نص ساعة وها كون جاهز 00
قسمت
يكون جهزت( يقوم صابر متثاقلا 00 يتثاءب 00 يخرج )
قسمت
آه يا ما ما
محمود
صحيح انتى وجوزك متأمن عليكوا بخمسين ألف جنيه
قسمت
مين اللي قال لك 00 هو هو 00 وهو ده وقته 00 أنا في أيه ولا في أيه
محمود
جوز حضرتك اللي قال لى00 وبيفكر انه يتخلص منك عشان ياخد قيمة التامين ويعيش متهنى
قسمت
قال لك كده
محمود
لا موش بالظبط00 لكن سمعته
قسمت
قال لك سمعته 00 المهم هو وبيفكر انه يتخلص منى
محمود
ما تتغدى بيه قبل ما يتعشى بيكى
قسمت
هو ده بالظبط
محمود
بس لو اتخلصت منه ، كل الشكوك هتحوم حواليك لأنك الوحيدة المستفيدة من موته
قسمت
واعمل أيه
محمود
هافكر لك في طريقة
قسمت
لسه هتفكر 00 زمانه لقي ميت طريقة عشان يتخلص منى
محمود
لسه متردد
صابر (من الخارج )
طلعي لى البدلة الزرقا
قسمت
واشمعنى الزرقا 00 ما تلبس الاسموكن
صابر ( يدخل )
هو أنا رايح فرح يا قسمت
قسمت
آه يا ما ما ( تفتح الدولاب وتعطيه بدله زرقاء 00 ويأخذ صابر في ارتداء ملابسه
صابر
ادينى انتهيت من لبسي 00 وانا نازل هاستناك في العربية( يخرج )
قسمت
وراك هوا يا حبيبي ( تأخذ في ارتداء ملابسها ، ممكن تغمى وشك عشان ألبس هدومى
محمود
أنا
قسمت
أمال أنا
قسمت
اقفل التلفزيون
محمود
ما ينفعش
قسمت
عاوزة أغير هدومى
محمود
وانا مالي
قسمت
ما ينفعش اقلع هدومى قدام حد غريب
محمود
وانا غريب
قسمت
ما انت عمال تتفرج وتبحلق فيا
محمود
ما هو المخرج عاوز كده
قسمت
ما هو لو ما قفلتش موش هكمل
محمود
هييه وعلى أيه( يغلق التلفزيون )0 ولما هما مكسوفين منا الرقابة ما بتعترضشى ليه( وقفه ) 00 ( يفتح التلفزيون ) 00 لبستى يا ختى
قسمت
أشوفك بخير ( تخرج )
محمود
ومنين ييجى الخير
00 والله ما أنا فاهم حاجة 00 أيه التمثيليات المعكننة دى00 هما بتوع التلفزيون موش هيرحمونا بقى من الروايات اللي زى دى 00 قال أيه التنين متأمن عليهم بخمسين ألف جنيه واللي هيموت قبل التانى الحي يقبض التامين00 وافرض التنين ماتوا مين اللي هيورثهم00 طب ممكن واحد يفكر انه يتخلص من التانى عشان يورثه00 ما هي مفقوسة00 ادينى معاهم للآخر ممكن تحلو( ينظر صوب التلفزيون 00 يفتح شباك غرفة نوم صابر 00 يقفز رجل ينظر يمينا ويسارا )
اللص
أديهم خرجوا 00 الواحد تعب من الوقفة وعلى بال ماخرجوا ما ضيعتش وقت00 أبدا بأيه 00 أبد أ بأيه 0آه الدولاب ( يفتح الدولاب 000 يقلب 00 يبعثر الأشياء 00 يفتح الدلفة الأولى 00الثانية 00 الثالثة 00يقع بصره على صندوق صغير00 يفتحه0 ) هو ده 00 ( يفتح الكوميدينو00) سجائر ( يضعها في جيبه) ما يضريش
محمود
ده انت حرامي فقرى قوى
اللص
الله 00 الظاهر فيه حد شايفنى 00 ( شاهرا الخنجر ويختبئ خلف الستارة ويضحك محمود00 ويتجمد اللص في مكانه )00 أنا موش شايف حد00 الصوت ده جى منين ( يزداد محمود في الضحك ) 00 أنا هاتجنن00 بعد المجهود ده كله والأخر انكشف لا 00 موش عاوز أقٌع 00 ولازم أخرج من هنا بسلام حتى لو أدى بيا انى أقتل
محمود
فيها قتل 00 دى هتحلو
اللص
مين اللي بيتكلم
محمود
أنا 00 اطلع من ورا الستارة
اللص
انت مين الأول
محمود
محمود
اللص
م00 حممممووود مين
محمود
اخرج وأنت هتعرف
اللص
معاك سلاح
محمود
اخرج
اللص
( يزيح الستارة وينظر حوله00 ) انت فين
محمود
بص قدامك هتشوفنى
اللص
موش شايف حاجة
محمود
بص بره
اللص ( ينظر من الشباك )

محمود
ياغبى بره التلفزيون
اللص
يوووووووه 00 انت بتعطلنى وهتنسينى دوري 00 هما يادوب مشهدين اللي قدرت أخطفهم من المخرج وهريت نفسي فيهم عشان أثبت نفسي فيهم 00 وسيبنى أكمل دوري الله لا يسيئك
محمود
اسمعني بس
اللص
انت فين الأول
محمود
أنا واحد من اللي يشوفوك في التلفزيون
اللص
كده 00 طيب ( يقذفه بوسائد السرير00 ويحاول محمود تفادى الوسائد ويقع على الأرض) وانت مالك انت 00 واحد فى حاله بيشوف شغله 00 مال أهلك
محمود ( يعتدل فى جلسته ) وهو يعنى المشاهد تنبل وخلاص ما يعلقشى ع اللي بيشوفه
اللص
وأنا مالي 00 عندك المؤلف والمخرج00 قول لهم الكلام ده 00 اسرق 00 اسرق 00 اقتل 00 اقتل 0
محمود
ما عندكوش حاجة تانية غير القتل والسرقة 00 دى السينما والتلفزيون اشتكوا م النوعية دى
اللص
الناس ما بتحبيش غير النوعية دى
محمود
القتل والسرقة
اللص
مافييش غير كده 00 عاجبك 00 ( صوت حركة فى الخارج 0)
محمود
أديك هتتففش يافتك وينقبض عليك
اللص
لكن المخرج ما قالشى كده
محمود
غير رأيه ونا ويين يقبضوا عليك
اللص
لا موش عاوز حد يشوفني
محمود
يمكن يكون المكان متحاصر
اللص
ولو
( تدخل قسمت مسرعة00 يختبأ اللص خلف الستارة )
قسمت
الله نسيته فين( تتجه ناحية الكوميدينو ) أنا كنت حطاه هنا00 راح فين بس 00 المرة اللي فاتت ماما كانت عند الدكتور ونسيته معاياوالوقتى طالباه منى00 راح فين بس 00 م تعمل واحد تانى( تتجه مسرعة ناحية الباب 00 ترى الدولاب مفتوحا والأشياء المبعثرة00 تصرخ 00 ترى الستائر تتحرك 00 تشدها 00 يخرج اللص ) 00 انت مين
اللص
( يشهر الخنجر فى وجهها ) ولا كلمة 00 سيبينى أخرج من غير ولا كلمة
قسمت
ما تقتلنييش
محمود
ما تسمعشى كلامها00 دول خاينين00 وما لهومش أمان ى00 اقتلها
قسمت
حرام عليك 00 هي دى الفكرة المهببة اللي كنت بتفكر فيها 00 روح منك لله
محمود
اقتلها
اللص
( مترددا ) لا يا عم
قسمت
خد اللي انت عايزه بس سيبنى أعيش
اللص
الله 00 لكن المخرج 00 قال لي تسرق وتخرج على طول
محمود
اقتلها 00 اقتلها 00 وتضمن منين لما تسيبها موش تصرخ وتلم عليك الناس وتتمسك وينقبض عليك بتهمتين 00 السرقة ومحاولة القتل وتاخد كام سنه وما تشوفشى الدنيا
اللص
لا 00 لا ( يطعن قسمت بالخنجر )
قسمت
لا 00 لا 00 ( تموت )
محمود
كده بقى تقدر نتفرج على تمثيل
اللص
مانت من شوية ما كانشى السرقة والقتل عاجبينك 00 منك لله ضيعت مستقبلي ( يقفز من الشباك )
محمود
بالطريقة دى ممكن صابر يصرف التأمين ، طب ممكن البوليس يشك فى انه القاتل ويروح منه التأمين0 ( يندفع المؤلف والمخرج إلى داخل الحجرة )
محمود
لحق البوليس يعرف
المؤلف
أنا ما قلتيش كده فى الرواية 00 اتفقنا انه يسرق وبس
المخرج
وماله لما يقتل 00 دى الرواية تبقى أحسن
المؤلف
يا أستاذ الناس موش ناقصة عكننه
المخرج
ولا نكد ولا حاجة 00 يبقى فيه شوية إثارة
المؤلف
الرواية ممكن تتلخبط
المخرج
سيب الأمور تمشى
المؤلف
تمشى إزاى إذا كان كل واحد ملتزم بالنص 00وكان المفروض إن قسمت هاتدخل وساعة ما هتخرج 00 هتكتشف السرقة 00 تصرخ 0يقوم يطلع صابروالجناينى يشوف الدولاب مفتوح والدنيا مقلوبة00 تقول له قسمت عالسرقة00 يبلغ البوليس 00 وييجى البوليس ويحقق
المخرج
ممكن تعديل بسيط 00 يحقق فى القتل والسرقة
المؤلف
بس الممثلين ملتزمين بالنص
محمود
الله يعنى أنت اللي غيرت كل ده 00 عجايب
المؤلف
بس اللي عاوز أعرفه مين اللي قال له يقتل الدنيا كده اتلخبطت
محمود
ولا اتلخبطت ولا حاجة، كده الصح ( صوت أقدام في الخارج )
المخرج
فيه حد جى00 يالله نستخبى قبل ما حد يكتشف وجودنا ويتهمنا( يختبئان خلف الستارة00 يدخل صابر )
صابر
هيا راحت فين بس 00 قالت لي 00 نسيت حاجة ونازلة على طول ( يرى قسمت غارقة في دمائها )00 قسمت مغمى عليها 00 ( يرى الدم000 يمسك الخنجر 00 ) قسمت 00 قسمت 00 قسمت انقتلت ( صمت صابر
المفروض انى ألقاها حية وبتبلغنى بالسرقة موش ؟ألاقيها مقتولة00 هي الرواية أتغيرت 00 وانا بأمثل ولا ده حقيقي 000 قسمت 00 قسمت 00 ردى عليا
ستار

المشهد الثاني
في حجرة الصالون00 محمود أمام التليفزيون 00 ( وتتركز الإضاءة على حجرة نوم صابر ) محمود
والله يإما أنا بحلم 00 يا إما الممثلين أتجننوا
صابر
لا حلم ولا حاجة00 انت صاحي وبتتفرج على خيبتى00 مراتى انقتلت 00 وبعدين اتصلت بالبوليس عشان يحقق ويعرف مين القاتل
محمود
انت القاتل
صابر
نعم 00 مانت شايف كل حاجة
محمود
لكن بصماتك ع السكينة
صابر
المخرج عاوز كده
محمود
بس المؤلف مقالشى كده
محمود
مين عرفك
محمود
كان لسه بيكلم المخرج ويظهر إن الأحداث على هوا المخرج
عشان فيها إثارة
صابر
إثارة أكتر من كده
محمود
وها تعمل أيه لما البوليس يسألك
صابر
أقول على كل حاجة
صابر
إنك قتلت
محمود
بس أنا ما قتلتيش
محمود
مانا شايفك
صابر
هتجننى ( صوت سارينة الشرطة في الخارج )
استلقى وعدك يا سبع 00 أهو البوليس جالك
صابر
كان مستخبى لي فين يا ربى00 أمثل ألاقى نفسي مابأمثلش00 كان مالي ومال الشغلانة دى
محمود
المؤلف عاوز كده 00 المخرج عاوز كده00 المنتج عاوز كده 00 وما فيش الممثل 00 آه( صوت جرس الباب 00 يخرج محمود ليفتح وتركز الإضاءة على حجرة الصالون000 )
صابر
أتفضلوا
( يدخل ضابط ومعه مجموعه من العسكر
الضابط
أيه اللي حصل
صابر
مراتى انقتلت
الضابط
قتل أيه يابنى00 الظاهر عليك موش حافظ كويس 000 موش مكتوب إنكم تبلغوا على جريمة سرقة موش قتل
صابر
قتل والله قتل
الضابط
مين القتيل
صابر
ما قلت لسيادتك 00 مراتى قسمت الشربينى
الضابط
فين الجثة
صابر
( يشير لحجرة النوم)
الضابط
( يفتح باب الحجرة)
صابر
سترك يا رب
الضابط
( يعود مرة أخرى ) 000
أيه التهريج ده00 جى أحقق في سرقة ألاقى قتل 00 دول يادوب كلمتين اللي حافظهم00 هاقول أيه00 هافشل في أول دور ليا 00 ما حديش قال لي إن الرواية اتغيرت
صابر
أنا نفسي مستغرب
الضابط
وهتعمل أيه الوقتي في الورطة دى 00 تلاقى الناس عماليين يتفرجوا عليا وهتبقى فضيحتنا بجلا جل
صابر
والعمل يا حضرة الضابط
الضابط
ظابط أيه وهباب أيه الوقتي 00 موش عارف هاقول أيه 00 كنت هادخل 00 هاعاين المكان00 أقول السرقة حصلت امتى00 كنتوا فين ساعة السرقة00 طيب 00 هنبذل كل جهدنا في ضبط المسروقات وبعدين أخرج00 ويخلص دوري
صابر
ما نكمل تيجى زى ما تيجى
الضابط
ونكمل إزاى00 إذا كانت دماغ الواحد فاضية 00 وأنا قعدت يومين أحفظ الكلمتين دول00 وقعدت أتدرب عشان أتقمص دور الضابط 00 مشيته 00 طريقته في الكلام 00 وبعدين آجى الوقتي وألاقى كل حاجة أتغيرت
صابر
نسأل المخرج00 ولا المؤلف
الضابط
ونلاقيهم فين
صابر
نرتجل من دماغنا00 تيجى زى ما تيجى
الضابط0
أرتجل00 آه 00 نرتجل 00 ده أنا عندي جوز رجلين ولا رجلين الحصان
صابر
ياخويا نرتجل يعنى نألف من دماغنا ومثل في ساعتها
محمود
يا عالم 00 يا هووا 00 الحكاية أتعقدت وماعتش فاهم حاجة00 الجماعة دول بيمثلوا
الضابط
الله هو فيه حد معانا( للعسكر ) 00 حد فيكوا التكلم
العسكر
( في نفس واحد ) 00 لا يا أفندم
الضابط 0 لصابر )
00 أنت اتكلمت
صابر
الظاهر المتنيل على عينه اللي عمال يتفرج علينا
الضابط
والناس كمان بتتفرج علينا 00 يا فضيحتك يا كمال يا شنبو 00 تاريخك الفني أتمسح في لحظة
صابر
بس ده أول دور ليك
الضابط
ماهو برضه هيتسجل فى تاريخي الفني
صابر
أتجدعن بقى واثبت نفسك
الضابط
هاحاول 00كنت فين ساعة الجريمة
صابر
كنت في العربية وكانت معايا 00 قالت لي أنها نسيت حاجة وطالعة تجيبها00 وبعدين لقيتها غابت 00 طلعت أشوف ها أتأخرت ليه00 لقيتها زى مانت شايف
الضابط
مقتولة
صابر
بالظبط
الضابط
وأيه يثبت انك كنت في العربية ساعة وقوع الجريمة
صابر
الجنايني

الضابط
( لأحد العساكر ) نادي لي على الجنايني
العسكري ( يرفع يده بالتحية العسكرية ) تمام يا أفندم
صابر
هو سيادتك بتشك فيا
الضابط
وليه لا 00 متأمن عليكوا بخمسين ألف جنيه وما حديش فيكوا هيستفيد بالفلوس إلا لما التانى يموت00 قمت قتلتها
صابر
انت كده هاتخلى الناس يفتكروا إن إحنا بنكروت0 وبعدين عرفت منين إن متأمن علينا
الضابط
فوت وخلاص
صابر
كمل 00كمل 00 ماهو يوم موش فايت
( يدخل العسكري والجنايني )
العسكري
تمام يا أفندم
الجنايني
فيه أيه يا بيه00 قعدت اجري ورا الحرامى ما لحقتهوش
الضابط
حرامي أيه وبتاع أيه يا راجل انت
الجنايني
الحرامى اللي سرق مجوهرات ست قسمت
الضابط
الست قسمت اتقتلت
الجنايني
بجد
الضابط
أيه يا راجل هو إحنا بنهزر
الجنايني
ما تأخذنييش يسعادة البيه أنا راجل بأحب الالتزام وبقالي اتناشر سنة كومبارس عمري ما خرجت عن النص
الضابط
كنت فين ساعة وقوع الجريمة
الجنايني السرقة ولا القتل
الضابط
القتل
الجنايني
بس النص بيقول سرقة
الضابط
قتل
الجنايني
سرقة
الضابط
( يشد شعره )
سرقة وقتل
الجنايني
مكتوب عندي سرقة
الضابط
حصل تعديل بسيط والمخرج خلا فيها قتل
الجنايني
وأنا طرطور عشان ما أعرفشى
الضابط
ويقول لك ليه إذا كنت انت حتة كومبارس لا رحت ولا جيت
الجنايني
والله إحنا غلابة
الضابط
ابقي روح اشتكى النقابة 00 كنت فين ساعة وقوع الجريمة
الجنايني
السرقة
الضابط
يبنى أدم جننتنى 00 القتل
الجنايني
أنا ما شوفتش الا السرقة
الضابط
يعنى اللي سرق قتل
صابر
يبقى أنا بريء
الضابط
وبصماتك اللي ع الخنجر
محمود
انتوا بتهرجوا 00 إزاى عرفت انها بصمات محمود00 موش لاز تقرير الطبيب الشرعي عشان تقدروا تحددوا
الضابط
اسكت انت وايش فهمك
محمود
ماهو يا تمثلوا حاجة تتفهم 00 يا تقعدوا في بيوتكم أحسن
الضابط
وده موش تمثيل
محمود
لا تهريج
الضابط
اسكت لأحسن أرميك في التخشيبة
محمود
التخشيبة 00 انت عايش في الدور قوى
صابر
ما لكش دعوة بيه00 وكمل يالله عشان نخلص
الضابط
وصلنا لفين
صابر
انت نسيتنا
الجنايني
بصمات الأستاذ صابر الموجودة على الخنجر
الضابط
وبصماتك اللي على الخنجر
صابر
حظي المهبب
الضابط
موش فاهم
صابر
لما استعوقت قسمت 00 قلت أطلع أشوف فيه أيه00 طلعت على فوق زى ما قلت لسيادتك00 وانا حافظ دوري وشويتين الكلام اللي هأقولهم وألاقى صاحبتنا غرقانة في دمها00 افتكرت 00 انا افتكرتها مغمى عليها00 لكن اكتشفت وجود دم ولقيت الخنجر مغروز في صدرها00 مسكته وأدى اللي حصل 00 وبعدين بالعقل كده موش لو كنت قتلتها كنت خبيت السلاح في أي مكان
محمود
لا زكى
صابر
ما تقاطعنيش
الضابط
كلام معقول 00 لكن موش كفاية عشان يبرأك00 وانت المستفيد الوحيد من موتها00 اعترف أحسن
صابر
ما عندكشى غير الكلمتين دول
الضابط
أعمل أيه00 إذا كان ما فييش نص جاهز
محمود
اللي خلاك ظابط ظلمك
الضابط
الأخ ده هيفرسنى
صابر
ما تستغربش،0 وطبيعي انه يعلق على اى حاجة00 وإحنا علينا إننا نتقبل الأمر الواقع
الضابط
إحنا بشر
صابر
أمال عفاريت 00 كمل 00 كمل
( صوت المخرج والمؤلف في حجرة النوم 00 )
المؤلف
لا موش ممكن 00 أنا موش هاسمح بالمهزلة دى
المخرج
طول بالك 00 كل حاجة ماشية عال العال
الضابط
الصوت ده منين
صابر
من أوضة النوم
الضابط ( للعسكري )خش شوف فيه أيه
العسكري
ما أقدرش يا أفندم
الضابط
انت بتعصي الأوامر
العسكري
الله لا يسيئك00 المخرج قال أقف وما تتكلمش 00 ادينى بانفذ الأوامر
الضابط
كله يقول أوامر المخرج00 كان مالي ومال الشغلانة دى بس
صا بر
ندخل نشوف فيه أيه ( يفتح الباب 00 يدخل غرفة النوم )
الضابط
آجى معاك
صابر
لا خليك انت ( يختفي )
الضابط
الواحد ما بقاش عارف رأسه من رجليه محمود
ده صوت المؤلف والمخرج
الضابط
واللي هيجيبهم هنا أيه
محمود
الوقتي تشوف ( يدخل المؤلف والمخرج ومعهم صابر )
المؤلف
لا يمكن أسمح باستمرار المهزلة دى
المخرج مهزلة إيه 00 انت اللي محبكها حبتين
المؤلف
تعبي وشقايا
المخرج
الرواية دى هتفرقع الدنيا
المؤلف دماغي أنا اللي هتفرقع
الضابط
ما حنا ماشيين تمام يا أستاذ
المؤلف
ياسيد 00 موش المفروض انك تحقق فى السرقة
الضابط
وادينى باحقق
المؤلف
تحقق إيه وتهبب أيه 00 انتوا بتشتغلوا بمزاجكوا
الضابط
لا بمزاج المخرج
محمود
فلقتونا بالسخافات بتاعتكوا 00 كل يوم نكد 00نكد 00 عاوزين شوية فرفشة00 الواحد يا دوب جاى تعبان وعاوز يستريح تقوموا تتعبونا بالنكد بتاعكوا
المخرج
دخلك إيه
المؤلف
بيقول رايه يا سيدى
المخرج
لما بيكون بيفهم00 ما أحناش ناقصين النقاد 00 هيطلع لنا سى بتاع ده كمان
المؤلف
وتقدر تحكم على عملك إزاى إذا ما عرفتش رأى الجمهور00 انت مخرج وسيد من يعرف
محمود
والله عندك حق يا أستاذ
المخرج
اسكت 00 ماوديناش في داهية غيرك
محمود
وانا مالي
المخرج
تحشر نفسك في اللي ما لكش فيه
محمود
وانا اللي قلت له اقتل
المؤلف
لا هو اللي قتل من نفسه
محمود
جايز
المؤلف
انت اللي لخبطت الدنيا
محمود
أنا مجرد واحد بتتفرج
المؤلف
واحد رايح يسرق 00 تقول له يقتل
محمود
ما كنتيش عاوزة يتمسك
المؤلف
ما كانشى هيتمسك
محمود
ما قسمت دخلت عليه وهو في الاوضة
المؤلف
لأنك عطلته بمناقشتك السخيفة معاه
محمود
كلكم هترموا بلاويكوا عليا، قسمت تقول انت السبب00صابر يقول لي انت السبب00 والمخرج يقول انت السبب ، مع ان الأحدث كانت ماشيه على هواه0000 حتى انت كمان بتقول انت السبب
المؤلف
تسمح حد يبادلك في عيالك
محمود
أنا ما اسمحش00 دول بلادى ولا يمكن أبادلهم
المؤلف
الرواية بالضبط زى عيالىوما حديش له الحق في انه يلعب بيها
محمود
فيلسوف
المخرج
يالله يا أستاذ نشوف شغلنا وسيبك من دوشة الدماغ دى
المؤلف
أنا منسحب
المخرج
والناس اللي بتشوفنا الوقتي نقول لهم أيه
المؤلف
ع الحقيقةاللى إحنا فيها الوقتي
المخرج
بأننا بضحك عليهم وما فييش تمثيل لان سيادة المؤلف موش عاوز تمثيل
الضابط
يا خسارة
صابر
تتعوض في مرة تانية
المؤلف
بنضحك عالناس ولا بنضحك على نفسنا 00 موش لازم نبقى مثال صادق للناس في تصوير الحقيقة 00 في كشف زيف الواقع00 في كشف عيوبهم عن طريق المرايا00 عشان نعرف الحقيقة حقيقة نفسنا00 نفاق 00 خداع 00 غش 00 زيف
محمود
بس ياأستاذ ما تنساش بضه انه فيه قيم جميلة عند الناس وممكن نتعرض ليها00 عشان الناس يتأسوا بيها00 موش بالقتل والسرقة
دا موش المجتمع يا سادة00 المؤلف 00المجتمع 00 الحرفى00 العامل 00 الموظف00 هموم الشعب ومشاكله00 البطالة00 الأمية 00 الانفجار السكانى00 وغير وغيره00 موش زى ما بنشوف في السينما بتاعتنااللى عمالة تبين المجتمع انه كله شوية حراميه وعصابات وشحاتين00 موش دا مجتمعنا يا سادة
المخرج
إذا كل ده والمجتمع ما بقبلشى الأعمال الهادفة00 في الأول لما ابتديت كنت مفتون بالتغيير 00 وفعلا عملت أعمال كتيرة نالت استحسان النقاد 00 لكن ما حققتش النجاح الجماهيرى00 وبعد عنى المنتجين00 فمشيت مع الموجة وادينى زى مانت شايف
محمود
نبدأ من جديد وتكونوا أيد واحدة 00 هتلاقوا النجاح على الأبواب
الجميع
00 م ا للحارة 000 للمصنع 00 نبدأ من جديد 000 م المصنع 00 نبدأ من جديد00 ونفكر في حلول في صورة بسيطة00 وبلادنا محتاجة لنا والخير قدامنا
محمود
نبدأ من جديد00 شبابنا والأمل 00 بلدنا محتاجة لنا
( تدخل زكية تهز محمود000 )
زكية
سى محمود00 سى محمود
محمود
نبدأ من جديد 00 شبابنا الأول
زكية ( تهزه بقوة ) اصحي يا اخويا
محمود ( مفزوعا )
فيه أيه
زكية
قوم نام جوه 00 التلفزيون شطب من زمان
محمود
فين المخرج 00 فين الجنايني 00 فين صابر 00 فين قسمت
زكية
هو انت تعرف ست تانية 00 الحقينى يا أمه

ستار
عطا درغام

الجمهور عاوز كده

الجمهور عاوز كده

رد: الجمهور عاوز كده

رد: الجمهور عاوز كده

رد: الجمهور عاوز كده