منتديات عطا درغام - جديدة المنزلة
بحـث
 
 

نتائج البحث
 


Rechercher بحث متقدم

المواضيع الأخيرة
 البوابة
 الصفحة الرئيسية
 قائمة الاعضاء
 البيانات الشخصية
 س .و .ج
 ابحـث

ياما جاب الغراب

اذهب الى الأسفل

ياما جاب الغراب

مُساهمة من طرف عطا درغام في الثلاثاء 5 مايو 2009 - 22:04

الشخصيات

سيد



أباظة



تحية



على



خالد



هند



رجال الإسعاف



رجال الش



الزبائن



المنظر

إلى اليمين محل أعلاه لوحة مكتوبا عليها سوبر ماركت الأمانة يحده سور حديدي من الجانبين وإلى اليسار مقهى شعبي 00 كراسي مصفوفة 00 زبائن جالسة 00 يسمع صوت صبى المقهى 00 واحد شاي تقيل وقهوة ع الريحة00 ومحل عجلاتي مكتوبا عليه عجلاتي الفردوس 0000 ويرى شخص يتجه ناحية السوبر ماركت ويقوم بفتح الباب 00 ويتجه إلى الداخل 00 ويسمع صوت القرآن الكريم00 يخرج الشخص وبيده مكنسة ويكنس أمام المحل00 وبعد أن ينتهي يقوم برش الماء 000 ويقبل احد الزبائن ناحية المحل 000 ويدخل العامل إلى المحل

الزبون :

ادينى علبة سجاير يا سيد

السيد(

يناوله علبة السجاير ) أتفضل ( ينصرف الزبون حتى يختفي تماما)

الســـيد :

سجاير ع الصبح 00 والله الواحد موش عارف الناس بتشرب السجاير دى ازاى وكده ع الصبح 00 الواحد ما يطيقش ريحتها

( وأثناء ذلك يقبل أحد الزبائن 00 )

الزبــون :

عندك عيش يا سيد

السيــــد :

أحسن عيش عشان خاطر عيونك

الزبـون :

العيش اللي اخدته أمبارح ما كالنش طازة

السيــــد :

كل اللي عندي طازة 00 والحلو عشانك

الزبون :

ادينى بجنيه عيش وبجنيه جبنه ثلاجة وبخمسين لانشون

( السيد يقوم بوزن الطلبات 0000 )

الزبـون :

أتوصى

السيــد :

من عينيا

الزبون :

حسابك كآم

السيــد :

أتنين ونص

الزبون : ( يناوله خمسة جنيهات 000 يناوله السيد الباقي )

(تقبل امرأة في خريف العمر تلتحف بعباءة وايشارب اسود )

المرأة :

ادينى يا ابني التليفون لو سمحت

السيد :

مباشر ولا عادى

المرأة :

لا مباشر في طنطا

السيد :

مليني النمرة

المرأة : (تناوله النمرة)

السيد :

يدير قرص التليفون 00 )

الو 00 ايوة معاك 00 اتفضلى يا حاجة

السيد : (يجلس على الكرسي في مواجهة السيدة )

المرأة :

الو مين معايا 000 الو يا على 00 يرضيك اللي بيعمله أخوك ده يا على0 رامي بنتي ومابيصرفشى عليها 0 والبنت حامل

معقول حمدي يعمل كده

المرأة :وها كدب عليك ليه 00 أخوك بيعمل كده ليه000 هو ده جزاتنا

ص على :

وحمدي فين دى الوقتي

المراة :

ما حديش عارف هو فين 00 سألنا أصحابه والناس اللى بيشتغل معاهم ولا حس ولا خبر

ص على:

واية اللى خلاه يعمل كده ص على

المرأة:

أخوك وأنت أدرى بيه00 كان ماشى فى أمانة الله 00 لا له ولا عليه000 من الشغل للبيت ومن البيت للشغل00 اتلم على ولآد الحرام جرى اللى جرى

ص على :

ومين اللى عمل فيه كده

المرأة :

انا فى بنتى الوقتى اللى موش عارفة اعمل ليها ايه 000 وبعدين واصرف عليها منين

ص على :

وأنا هاعمل لك أيه

المراة :

موش أنت اخوه

ص على :

وذنبى انى أخوه

المراة:

أنا باستنجد بيك 00 تشوف لفى حل 00

ص على :

انتى المسئولة وانا سبق قلت لك وحذرتك من الجوازة دى00 وقلت لك ان حمدى موش بتاع جواز00 وما يقدرشى يتحمل مسئولية

المراة :

انت شمتان فيا يا على

ص على :

لا سمح الله أنا موش شمتان ولا حاجة بس انا بالفت نظرك للى كان غايب عنك من زمان

المراة : حرام عليك 00 أكلمك وأستنجد بيك عشان تشوف لى صرفة تقوم تشمت فيا 00 منك لله يا شيخ ( تضع سماعة التليفون حسبي الله ونعم الوكيل 00 منك لله يا شيخ 00 أعمل ايه بس يا ربى 00 جوز بنتى طفش وما حدييش عارف هو راح فين 00 والولد اللى فى بطنها أروح بيها وبيه فين 00 وهاعمل ايه ومن هيصرف عليها 000

سيد :

هدى نفسك يا حاجة 00 واتفضلى اقعدى ( يناولها كرسيا )

المرأة l تبكى وتجفف من دموعها 00 )

جوز بنتى هاجرها من زمان 00 اتغرينا فيه00 وعمل لينا البحر طحينة 00 وافقنا عليه 00 وجوزناه البنت 00 وسكن مفروش وكان كويس 00 شهر والتانى 00 وبعدين اتقلب ع الوش التانى وقعد من الشغل واتراكمت الديون عليه 00 قام طرده صاحب الشقة هو ومراته وقعدوا معانا00 واحنا على بعضينا انا والراجل وست عيال 00 كل يوم شكل ونقار 00 لغاية ما بقت حياتنا كلها قرف فى قرف وبعدين حصل اللى حصل00 وهرب جوز بنتى وهى حاملا

سيد :

هدى نفسك يا حاجة 00 ومسير الغايب يرجع وكل حاجة تتحل ان شاء الله

المرأة :

حسابك كام يا ابنى 00

سيد :

خلاص يا حاجة خليها علينا

المرأة :

حسابك كام يا ابنى 00

سيد :

هدى نفسك يا حاجة 00 ومسير الغايب يرجع وكل حاجة تتحل ان شاء الله

سيد : خلاص يا حاجة خليها علينا

المرأة :

متشكرين ياابنى ( تدس النقود فى يده وتنصرف )

سيد :

لا حول ولا قوة الا بالله 00 الدنيا ياما فيها بلاوى

0( يسمع صوت ضرب وصراخ فى المقهى 000 وشتائم وسباب00 يا ابن الكلب 00 يا ابن الزانية 00 الله يلعن 00 !( يخرج سيد مسرعا من المحل00000 )

السيد: أعوذ بالله 000 أمتى نرتاح من الغرزة المقرفة دى 000 اللى لامة لنا ناس ما يعلم بيها إلا ربنا0000 كل يوم مشاكل والحكومة كل شوية 0000

( يرى شخصان يتعاركان 000 أحدهما يحمل سيفا زمطواة والآخر أعزل بدون سلاح ويهجم على الشخص الآخر0000 ويصيبه إصابات مختلفةفى أماكن مختلفة من جسمه ورواد المقهى ساكنون لا حراك000 ويخرج المصاب من باب المقهى مترنحا من أثر الإصابة00 ويتجه ناحية السوبر ماركت00 ويرتمى بجوار السور المقابل للمقهى000 ويتوجع بصوت عال جدا 000 ويصرخ لمصاب

آه 00 إلحقونى 000 آه 000 إلحقونى

السيد ( يرفع سماعة التليفون 000 )

آلو الإسعاف00 فيه واحد مصاب عندنا 000 العنوان شارع النصر رقم 14 ( يضع سماعة التليفون 00000 )

السيد:

آدى اللى بناخده من الغرزة000 دى ع الصبح

( ينادى على شخصا يمر أمام السوبر ماركت 000 )

السيد

وهى الخناقة دى علشان أيه يا أباظة

أباظة

( شخص نحيف 00 متوسط الطول 00 ذوشعر مفلفل 00 يلبس سلسلة ذهبية00 وتى شيرت 00 والوشم على ذراعيه000 ويحمل حقيبة سوداء00 ) بيتشاكلوا علشان فردين حمام

سيد

عشان أيه 0000 !!!

أباظة

واحد اشترى من واحد حمام وما اداهوش تمنه00 قام طالبه بيه 00 ومارضييش يدفع 00 قاموا اتخانقوا00 وواحد فيهم عور التانى00 والنبى ياسيد خد الشنطة دى عينها عندك (يناوله الشنطه )

سيد

إوعى يكون فيها ممنوعات يا أباظة

أباظة

عيب يا عم 000 إحنا بتوع الكلام ده 00 انت لسه هتعرف أباظة النهاردة 000

(ينصرف أباظة 000 ويسمع صوت سارينة الإسعاف من خارج المسرح00 يدخل رجلان يحملان نقالة 000 )

أحدهما

مين المصاب

سيد ( يشير إلى الرجل المصاب 000 يحملاه خارج المسرح00 ثم يسمع صوت السارينة معلنة عن انصراف الإسعاف 000 )

عطا درغام
Admin

عدد المساهمات : 908
تاريخ التسجيل : 24/04/2009

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: ياما جاب الغراب

مُساهمة من طرف عطا درغام في الثلاثاء 5 مايو 2009 - 22:05

سيد

إصطباحة ما يعلم بيها الا ربنا 00 الواحد لسه بيقول يا هادى 00 تيجى المصايب ورا بعضها0000 ربا يتوب علينا من الحتة دى ومن بلاويها 0000 ( يقبل أحد الزبائن 000 )

الزبون

ادينى التليفون من فضلك

سيد

( يناوله التليفون ) اتفضل

الزبون

(يرفع السما عة 00 ويدير قرص التليفون على النمرة 000 )

آلو00 تحية 00 موش عارفانى 00 قوام نسيتى صوتى00 نسيتى الايام الحلوة اللى قضيناها مع بعض والسهرات الحلوة 000

صوت تحية

آه 00 يخرب عقلك يا محمود 000 انت صوتك اتغير قوى يا مضروب

محممود

لا خفيفة قوى يا بت 00 دا انا كنت لسه مكلمك الأسبوع اللى فات 00 قوام لحقتى تنسينى 000

ص تحية

أنساك برضه 00 ودى تيجى

محمود

عملتى أيه فى اللى كلمتك عشانه

ص تحية

كلمتنى عن أيه

محمود

قوام نسيتى 000 فى الليلة الحلوة 00 اللى هنقضيها مع بعض

تحيه

انت عارف شروطى 000 خمسميت جنيه

محمود

كتير قوى يا تحية 00 وبعدين هنبقى تلاتة

تحية

يبقى ألف ونص

محمود

كده أنا ها ازعل منك

ص تحية

وأنا ما أقدرش على زعلك 00 بس أنت عارف إن انا باديلك حاجة غالية قوى

محمود

هاعرض عليهم طلباتك وبعدين أرد عليك00 وأتمنى انك ما تكسيفينيش( يضع السماعة 00 ) 00 حسابك كام

سيد

جنيه ونص( يناوله محمود النقود 000 وينصرف خارج المسرح من اليمين )

سيد

الدنيا ما عتشى فيها أمان 00 الظاهر إن القيامة هتقوم000 أيه ده يا جدعان 000 الدنيا حصل فيها أيه00 لا عاد فيه حيا ولا دين000 وصلت بيه السفالة إنه يطلب متعة رخيصة بالشكل ده وعيني عينك 00 الحق موش عليه 00 الحق على السافلة بنت السافلة اللي سمحت له000 وأديت له الفرصة000 ليه يعنى 00 وعشان أيه 00 عشان الفلوس 00 تغور الفلوس فى داهية 000 دا الشرف غالى000 ما تشتغل ولا السهل ما فييش أسهل منه00 وتتقاول مع تلاتة مرة واحدة00 يا بجاحتك يا شيخة00 آخذاها مقاولة 000 ( يهز رأسه 00 ) الظاهر إن صحتها مساعداها00 وربنا يقويها0000 واهو من يوم ما التليفون أتركب في المحل0 والواحد يا ما بيسمع بلاوى00 صحيح أنا ما باتجسسش على الزباين00 بس الواحد بيسمع غصب عنه00 دنيا تانية 00 وعالم تانى00 وكل واحد وله همومه00 ومشاكله00 اللي بيحب 00 والى بيدي ميعاد 00 واللي بيطمن 000 واللي 000 والى 000 واللي تقبل فتاة 00 متوسطة الطول00 شعرها يميل إلى الإصفرار00 نحيلة الخصر00 بيضاء ويشوب بياضها حمرة في وجهها 00 أنفها دقيق00 في حدود الرابعة والعشرين من عمرها 00 )

الفتاة:ممكن التليفون بعد إذنك

سيد (في نفسه )

أيه حكاية التليفون النهاردة بالضبط ( يناولها التليفون )

الفتاة ( رفع السماعة 00 وتدير مؤشر الأرقام00 )آلو 00 خالد

صوت خالد

يا نعم

الفتاة

صباح الخير يا حبي

ص خالد

صباح النور يا هند

هند

وحشتني يا حبي

ص خالد

وانتى أكتر يا روحي

هند

الله 00 يا سلام00 قولها كمان وكمان

ص خالد

وأقولها وأقولها 00 وانتى اكتر يا روحي

هند

موش خايف لماما تسمعك

ص خالد

ماما موش موجودة 00 ما تيجى تقابليني الوقتي

هند

فين

ص خالد

البيت

هند

ما اتفقناش على كده يا خالد 00 أنت قلت لي إننا هنروح شقة واحد صاحبك قاعد لوحده

ص خالد

إنا موش لاقيه وموش عارف أتلم عليه ابن ستين في سبعين

هند

عندي لك حتة مفاجأة لصاحبك 00 حتة زى السكر00 ودمها خفيف

ص خالد

موش قادر أصبر

هند

أتصرف في المكان 000 وانا اتصل بيك بكرة الساعة 5 ( تقبله فى التليفون00 سيد يبتسم ابتسامة خفيفة ثم يحملق فيها0000 )

هند

حسابك كام يا أخ

سيد ( شاردا )

هند

أنت يا أخ 00 حسابك كام

سيد

عشر ة جنيه

هند

عشرة جنيه ليه 00 باكلم لندن

سيد

معلهش 00 جنيه

هند

اتفضل ( ترمى الجنيه 000 وتنصرف 000 )

سيد

يا أبويا على البجاحة ، واحدة زى دى الواحد هينتظر منها ايه،ربنا يحفظنا000 يا ترى مستخبى أيه تانى النهاردة000 اليوم ده موش باين له آخر

( يسمع سارينة الشرطة خارج المسرح 000 يمتلئ المسرح برجال الشرطة 00 يندفع سيد خارج المحل000 رجا الشرطة يحاصرون القهوة00 ويسمع صوت ارتطام الكراسي بالحائط000 زجاج يتكسر 0000 )

سيد

يا نهار موش فايت يفاجأ السيد بأباظة يجرى عبر المسرح مندفعا إلى داخل السوبر ماركت000 دون ادني مقاومة من السيد 0000 ) أنت رايح فين يا أباظة ،استني ( يندفع ثلاثة من العساكر ناحية السوبر ماركت

سيد

بتدوروا على حاجة

الأول

إحنا بنطارد واحد عليه أحكام 00 وشفناه بيجرى ناحيتك الوقتى

والظاهر انه دخل عندك 000000000

سيد

( في نفسه )00 يا ابن الأيه يا أباظة000

مين اللي دخل عندى000 أديك شايفنى واقف بره 00 لا أنا دخلت حد ولا شفت حاجة

الثانى

(يغافل سيد ويدخل المحل 0000 )

سيد

أيه اللي خلاني أقول كده000 رحت في داهية ياسيد ( ويخرج رجل الشرطة ممسكا بأباظة 00 ويضع الكلابشات في يديه

الثالث

والله ووقعت يا أباظة 000 خمس شهور وأنت مدوخنا يا راجل00 يالله انجر قدامى000

( ينصرف الرجل الثانى بأباظة إلى خارج المسرح 000 )

سيد

أنا كنت واقف بره وما شفتوش 000 يمكن غافلني ودخل من ورايا

الأول

أنت \متهم بالتستر على متهم خطير وهارب وعليه أحكام 00 انت مقبوض عليك

سيد

ويتقبض عليا ليه00 انا ماعملتش حاجة ( يمسكه الشرطى من ياقة القميص ))

الشرطي

ابقى قول الكلام ده للبيه الماموريا حبيبى لما لاتشرف فى القسم 00 يالله اقفل المحل

سيد

واقفل المحل ازاى والوقتى صاحب المحل فاكر ان المحل مفتوح اقوم اقفله

الثالث

ما تضيعش وقت 00 دخل الحاجة دى جوه ( يحمل بعض الاشياء ويدخلها00 ( يقع بصره على حقيبة سوداء ويدفعه الفضول الى السؤال وتفتيش الحقيبة 0000 ) الشنطة دى فيها ايه

سيد ( بسخرية)

وهيكون فيها أيه ان شاء الله 000 مخدرات

الثالث

وليه لا ( يفتح الشنطة 00 ويتفرس فيها 000 )

يا وقعتك المطينة 00 انت بتتكلم جد 000 الشنطة فيها بانجو

سيد

ب ب ب ب ا00 نجو 000 ازاى 00 الشنطة دى موش بتاعتى 00 انا ما اعرفشى حاجة عنها 00 دى بتاع اباظة

الأول

أيوه اباظة شريكك 000

الثالث

( يضع الكلابشات فى يد السيد 000 )

يالله البس الاساور الميرى 00 عشان تستلقى وعدك 00 التستر وإيواء مجرم خطير 00 وحيازة مخدرات والاتجار فيها

سيد

يا نهارك مطين يا سيد000 كل ده يحصل لك00 منك لله يا أباظة 00 كان مالة ومال معرفتك اللى وديتنى فى داهية

الثالث

يالله قدامى يا متهم

( ينصرف الشرطيان وسيد خارج المسرح 000 صوت سارينة الشرطة)



ستار



بورسعيد في 4/7/2001 عطا درغام

عطا درغام
Admin

عدد المساهمات : 908
تاريخ التسجيل : 24/04/2009

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى